原來HBO已經整緊Spin off 系列- Dune: The Sisterhood
即係Part 2基本上拍硬
HBO GoT完後欠franchise, 第二本書打後故事變埋HBO max series都有可能

多謝解說~

真係沒想到套戲竟然可以悶到瞓足全場，白白浪費了兩個半鐘和百六蚊！

我都係第一次睇戲這情況，可以睇幾分鐘便瞓着，之後醒返睇幾分鐘又再瞓着返，醒、瞓、醒、瞓，就這樣不斷輪迴到完場…

真係冇陰功，唔係每個人都啱每一套戲。

上咗晝嘅國家，上週末共收 3 仟 7 佰万，極之唔錯。尤其係到呢個數嘅速度快過今年好多大片。
https://www.screendaily.com/news/dun...163452.article

咁呢套真係唔係炮谷片可以9成人都鍾意,電波唔夾就唔夾

如果唔係事前睇左 肉羊哩咖兄的簡介，自動補完左劇情上不足，套劇靚還靚，都會覺得悶，始終呢個Part One其實唔係好多事發生過...

有人之前讀過呢個版本嘅劇本，睇咗之後發現咳咗好多解說嘅劇情，可能無「準備」嘅入場會難明啲。

最近聽返第一部書多一次，再睇返啲反應，原著的確呢套真係「無可能拍成電影」，劇情慢，人物多，個個有啲啲戲份，講多過做，每個人動機又複雜，背景又要一舊舊式慢慢滲出嚟，睇漏咗前頭就唔明後理。最初無人解過咩事，好難想追落去 -- 當年本書同 Sci-Fi Channel 個片集，睇咗無耐就放棄就因為係噉，之後睇咗啲解說片，知道大致故仔係乜，就會投入啲。

好煩都講多次，第一部書都叫做多大場面同動作，去第二同第四部書，一心想爆谷嘅會仲悶～

都講過，呢部書實在太經典，好似 Foundation 同 Ghost in the Shell，實在太多其他知名嘅作品都用咗佢哋某啲元素，結果啲原作後來嘅話，一般觀眾會覺得了無新意，因為後來先上岸先入為主，一個唔好彩落入低手嚟搞，仲弊都唔在講。

未講佢啲「電影史」之前，呢套片講有咩其他作品提到 Dune，大部份未睇過，不過幾好笑：

睇左
基本上除左知係科幻經典改篇同電影只係故事序幕外0知識睇
感覺唔錯，鐘意哩種外星高科技但政治文化仲好中世紀既世界觀，期待第二集
不過覺得成日插入預知好打亂節奏
由手機版發出

睇完後覺得。。

唔明點解唔用 水 換 香料

咁係唔係成個故事完左

我感覺係帝國根本唔使同原居民講條件想攞就攞
開頭都話戰士威脅唔倒佢地王叫佢地走先至走
由手機版發出

好問題，接樓上講嘅，首先班「原住民」一盤散沙，唔夠人多；仲弊嘅係，科技同武力同唔及啲班外來人，班帝國軍用，打自己人唔會用嘅激光鎗，都掂嘅時候，就噉畀人撳住搶，係可以同班王侯貴族打工，但分到嘅唔成比例，完全係玩殖民主義，呢套講得比 Avatar 仲切底。

本人諗多咗，仲有其他 HISHE:

香料既然珍貴罕有，又有大量需求，梗有人開發代替品，一嚟利之所在，二嚟可以乘機撈政治油水；頭四部書無提到呢樣，點解無人噉做唔知，本人斷估，因為無電腦，生物技術又係極少部份人嘅專利，開發可能極難，再加上故事開始前，香料仍然係可以「如取如攜」，無人噉「得閒」去研究香料究竟係乜嘢嚟，更唔好話諗代替品。

咁各政治勢力，上至王室，下至宇航公會同女巫，獨佔咗個沙丘星球，咪可以話晒事囉？

• 講皇帝先，當時帝國極大，無班貴族支持分担共管唔掂；調轉頭，又怕班友夾埋反佢，要治班貴族，一方面長期挑撥各大小貴族之間不和，等佢哋專心鬼打鬼，無時間諗挑戰王位，佢哋唔會公開打，好似戲入面噉，玩暗殺；另一面以實利引部份人幫佢；而皇室仲有另一張王牌，戲有講，唔重覆。
  
• 而貴族之間，無人願意居於原本噉高噉大嘅之下（奧貝斯坦套「第二危險論」），加上長期勾心鬥角之下，無互信好難合縱，就算搞到合作，無人有信心夠皇帝張王牌玩。
  
• 噉宇航公會，佢絕對有可能自己出手，或者同某一兩個大貴族夾埋做嘢；本人又斷估：首先，佢同皇室有某種歷史以嚟嘅共生關係，甚至佢可能先至係「幕後話事人」，意識上唔會亂噉「斬纜」，怕無咗個「專利」，二嚟皇室同大小貴族都大量屯積香料，既係實際財富，又可以係防止有人「吊高嚟賣」，或者玩禁運，公會好難玩嘢，再則都係好怕萬一有人反枱，香料無咗或者再無價值，就唔掂。更唔在講，公會連實際武力都無，講咩～
  
• 而班女巫，佢哋太沉迷玩「配對」遊戲，大慨諗都唔會諗。

終於睇咗。以睇過吓部書嘅人嚟出發：

好：畫面攝影靚到痺，Han Zimmer 嘅配樂都掂，做 Paul 同 Jessica 嘅都出式。故仔有時慢咗啲但都通順，未睇過書嘅都跟到；肉搏戰都打得好睇。

唔係噉好：前面長咗啲，搞到後面好多主角側不爆鑊之前啲不安猜忌唔夠張力，所以爆邊個係二五仔嗰陣唔係幾夠震撼，連帶奸嗰邊又無乜機會發揮Baron 同個侄仔 Dave Bautista 佔戲太少，書多好多；而配角，兩個「人形電腦」戲份太少，奸嗰個，84年片嗰仲出過呢個，嘥晒。Jessia 獨自喊嗰場完全離咗格。主要嗰個大場面太黑，可以做得刺激啲。

睇多次，IMAX 版真係正好多，不過個畫面係光咗啲，都係暗得滯～

故仔角式異同，下可能涉及劇透，不喜勿入：

1. Paul：基本上無大改同略過，最重要呢度預先講明，佢發現自己，係好多人特登安排落嚟嘅產物，好唔老嚟；再者，佢預見好多嘢係無發生到，好似最尾發生之前佢已經預見到某人，仲好似好 friend 噉，呢個只係其中一個可能性。

另外，好多人以為 Gom Jabbar 係個盒，其實係支毒針，貴族中「普遍使用」，個盒始終叫做 「The Box」，係 Bene Gesserit 不傳之秘嚟。

2. Jessica：除咗佢自己一個人會喊，「突然」識武功，同埋同陰謀有關個「秘密花園」之外，無乜。佢同阿仔溝通嘅手語，究竟係 Bene Gesserit 嘅暗語，定係 Atreities 家嘅戰鬥用手勢，無講清楚，不過照之前嘅用法，似乎係後者多啲。

3. Leto：佢好錫個仔，呢度好出。書入面講佢更清楚更接近實在發生緊咩事，但無計佢都要「鍾」個頭入去，搞到心力交瘁；再者，書有好多小節講佢點待人接物，尤其有場大夜宴，再者佢發覺對家要謀害個寶貝仔，唔係一句話就算數，可能因為咳咗成條陰謀線，所以冇咗咩下文。

仲有隻牛頭不時出現，只係略略提到，內情係 Leto 個死鬼老豆，上一代公爵好鍾意玩鬥牛，唔知係娛人定係演嘢娛眾，最後搞到命仔都無埋。呢度咁著重，究竟係個警示定係諭義，待考。

4. Harkonnen 男爵：係好有迫力，原著佢第一次出場，已經同兩個姪仔講晒個陰謀出嚟，仲老早爆咗邊個係無間道，呢度無晒，個細姪，係佢意中嘅繼承人，下半 part 幾緊要，套戲完全失緃；亦無解釋到男爵點解「識飛」，仲有佢孌童嘅嘢該晒；出事嗰吓佢無咁大鑊，事後完全識行識走，亦無側寫佢同佢班下屬嘅關係。

5. 陰謀：戲入面發生得好似好突然，之前只係用對白若隱若現噉提（"When is a gift not a gift?"）書入面老早揚晒咩事，而成班 Atrieides 上上下下都早知有唔妥，人心惶惶，最後仲幾乎鬼打鬼，情節好緊張；唔係噉好嘅就，一則無帶出某角式佢哋以為根本唔會害人，再者弱化晒班 Mentat 有幾巴閉 -- 佢哋唔只係識計數，最重要係佢哋靠不斷涉取資料做分析，所以謀略戰術上極受重用，Atreides 家嗰位，侍奉咗好多代公爵，唔好睇佢噉「圓」，係首席刺客，出事之後仲有下文，呢度無晒；而 Harkonnen 家嗰位，唔係戲入面噉係個高級打雜，佢自以為係佢一手度出個陰謀出嚟，因佢既變態又迷戀 Lady Jessica 美色，而佢老細又相當「鼓勵」，冇發現佢只係個「用完即棄」嘅道具嚟。

6. Duncan Idaho：套戲個款係熟咗啲，但完全做到蕭洒不凡，武功卓越嘅型格。戲份多咗好多，下場又夠轟烈，書入面無太多講佢同 Paul 有啲兄弟情，反而提到佢好受啲女嘅歡迎，呢方到後面啲書仲突出啲。

7. Gurney Halleck：套戲寫得到好基本，無講佢點解噉熟 Harkonnen 嘅事 -- 書講佢後生嗰陣，畀 Atrieides 由 Harkonnen 奴隸營教出嚟，對 Harkonnen 有不共戴天之仇，所以絕對忠心。佢亦彈得一手好琴，Atrieides 家中上上下下都好欣賞佢啲歌，戲只係得一句對白略提。

8. Muad'Dib：發音近似 moo-ah-dib，係 Dune 星上一種小鼠，套戲起碼有三次出場，耳仔比例上極大方便散熱，又識得飲返自己啲汗水嚟保存水份，Fremen 發現佢嘅生存之道好值得學習，叫呢種鼠做 muad'dib，阿拉伯話意指「老師」，亦係 Dune 星第二月亮上個「陰影」，但戲入面完全無提過個名，而書入面 Paul 由預視之中，改咗個本地名叫 Paul Muad'Dib。後嚟全宇宙都淨係叫佢做 Muad'Dib，呢個係後話，不按下表。

9. Liet Kynes：除咗性別轉咗，基本上無大更改。佢個結局比書入面講嘅壯烈，亦無噉「長氣」，但漏咗樣同香料有關好重要嘅情報，後面可以補完返，所以無所謂，唯一想知嘅，原作佢係某角嘅親人，呢度唔知佢會點處理。

補多樣嘢：Lady Jessica 雖然生咗個繼位人出嚟，但唔係 Leto 個老婆，只係妾待。因為貴族間嘅婚姻完全係政治關係，Leto 要「留位」等個正室可以光大門眉；Jessica 做出叛教嘅行為，當中一句對白，同埋最收尾個反應，顯出佢倆個有真愛情。

【特報】Part 2 開拍決定！！！予計 2023年 10月上。

睇第三次，個戲院都成四份一滿，好似仲多人過 Shang-chi 睇第一個星期～留意到好明顯當中係有人第一次睇，啲笑位固然識笑，連唔應該係係笑位嗰個都笑～有睇嘅應該知係邊。

講多兩句：

• 留心故仔唔係發生嚮西曆一萬年，而係宇航公會成立一萬幾年之後，而個公會成立於西曆過成萬年之後。
  
• 未有公會之前，人係靠電腦計算空間摺疊，後者叫 Hoffman 效應，嚟即時交通；無咗電腦之後，因為唔知航道中有冇危險，事故發生率有成八份一以上，令到好多星球發生饑荒。後嚟有咗香科成立咗宇航公會之後，交通變返正常。電影無提到場電腦戰爭，有眼利嘅 YouTuber 留意到戲入面個「管」唔似係太空船，而似係個隧道噉，接通兩個星球。
  
• 而導演亦用返佢套 The Arrival 嘅故技，太空船啲大細比例都得好精巧，見降落地面啲太空船有幾巨型，但比起宇航公會嗰啲，仲細個粒豆～

都係趁蜘蛛仔未上，找埋啲數先：

當年第一套書紅咗，荷里活已經打佢主意，先後有兩班人想拎嚟拍，後者仲搵埋大導演 Ridney Scott 執導，但都唔成事。之後超現實電影大師 Alejandro Jodorowsky 都參一腳，仲搵埋一班佢心目中嘅「戰士」幫手 -- 好似做設定嘅 H.R. Giger 同 Pink Floyd 個音樂。不過一嚟佢無心忠於原著嚟拍，再者佢個腳本都係十幾粒鐘噉長，無間片商肯畀佢開戲。結果佢啲恴念同企劃流落到去好多 80 年代嘅電影，好似《異形》同《奪寶奇兵》，關於呢套拍唔成但影響極深遠嘅電影，有套紀錄片請咗 Jodorowsky 現身說法，有興趣不妨搵嚟望望。

之後拎住電影權個製作公司，睇咗 David Lynch 套《象人》之後，覺得佢「好啱」拍呢部作品；當期時 Lynch 一炮而紅，甚至連 RotJ 都搵過佢執導，但佢最後接咗 Dune，佢無睇過套書，單靠零碎資料又寫又拍，佢玩咗好多嘢，好似男爵面上面啲泡泡，放嚟今時今日，實會「被撞期」而炒魷，而為咗慳錢，唔單止搬去墨西哥拍，工作人員好多都同期拍緊套 Conan The Barbarian，有啲戲服係由用過嘅屍袋改成～

因為部書太過複雜，Lynch 整咗套成三粒幾鐘嘅版本，但發行商話唔得，兩邊講唔掂數，個監製監粗剪咗個兩粒鐘到嘅版本出街，結果書迷就嘈太過省略，同埋完全遣返原作嘅意思，而未睇過書嘅就睇到一頭霧水。後嚟放上電視播，Lynch 唔肯再剪，結果片商又整咗個成三粒鐘嘅版本放上電視，導演嬲到爆，話同套片斷絕關係，電視版個導演同編劇都用假名代替。過咗差唔多四廿年，David Lynch 之後再唔拍爆谷片，舊年接受專訪仲講，對呢次個經歷仍然未能平服～～～ 有網民用唔同版本嘅片斷一再整理剪輯過另一個版本，好多人都讚通順同易明咗好多，但個結局都係離咗譜～～～ 有興趣可以用 Spicediver 去搵搵。

Part 1 究竟咳咗啲咩，呢度有啲料：


出 Extended Edition 喇唔該。

Florence Pugh （Midsomer, Black Widow, Hawkeye）參演 Part 2，傳佢演 Princess Irulan。正路戲份唔多，咁嘅安排希望佢有 Part 3

而全人類皇帝，正式 title 係 Padishah Emperor Shaddam IV of House Carino，會由 Christopher Walken 飾演！
https://www.theverge.com/2022/5/12/2...n-emperor-cast

又有新參演嘅消息，作為皇帝唯一老死兼御用刺客 Fenring 伯爵，佢老婆 Lady Margo Fenring 會由 Lea Seydoux （No Time to Die, French Dispatch) 飾演，Lady Fenring 原著小說中個戲份好少，完全唔及佢老公咁耀眼，但 Count Fenring 佢本人，都唔重戲份，讀過小說嘅，會對呢個人物印象好深。既然係咁都㨂個幾有名嘅演員，會唔會有改就令人期待。

Dune《沙丘瀚戰》係iTunes做緊特價賣$48,
支援4K Dolby Vision及Dolby Atmos。

講起《貓王》，上咗身個男主角 Austin Butler 會演 Feyd-Rautha Harkonnen，Baron 個細侄，亦係男爵意中嘅繼承者，個大嘅只係當打手。

原本上半部有份，呢度改度下半先登場，如果 Lady Jessica 聽話頭一胎生嘅係女嘅話，班巫婆意中就嫁過去畀 Feyd-Rautha，就完成佢哋個生育計劃。有理由相信呢位細侄都有一定程度嘅能力，原著佔戲比 Princess 仲重，會改成點令人期待。

Part 2 開鏡！暫時知會嚮布達佩斯、阿布達比、約旦同意大利拍攝。

We’re rolling. Production on Dune: Part Two has begun. #DuneMovie pic.twitter.com/H31MTEcvcS

— DUNE (@dunemovie) July 18, 2022

新消息，而家新映期係出年 11 月 3 號：
https://www.msn.com/en-us/movies/new...23/ar-AA12QWwT