曼聯躉紅魔鬼地帶[VOL.98]

[Busconcamp]

[多奇出品] - 馬斯亞的未來



馬斯亞依個名只要一喺正選名單出現，球迷就會即時諗到點解係佢？仲出佢，玩咩？今場波馬斯亞响今季英超比賽首度正選登場，結果喺毫無建樹下於下半場被調出。賽後當然受到唔少球迷評擊：「佢又喺球場行行企企，帶住個波唔係甩腳就係死衝，仲有又唔肯主動走位配合隊友，令到球隊整體進攻模式單調，對方容易防守。」

馬斯亞就算表現幾差都好，都有蘇B為佢講好說話。筆者明白喺新一季蘇B想睇吓馬斯亞究竟有幾大改變，但最後發覺佢係原地踏步。一個人最可悲唔係退步，而係佢以為自己做好多嘢改變到自己，但其實最終係打回原形，與其係咁馬斯亞就不如唔好嘗試作出任何改變，要跳出框框嗰個應該係蘇B。

依個蘇B對馬斯亞喺曼聯未來嘅發展可以有三個選擇：一、就係繼續場場俾佢踢正選。二、賣走佢。三、就係俾佢主要踢下盃賽。

一、如果係俾馬斯亞踢正選，筆者建議可以俾番佢踢左翼，因為只有左翼發揮到佢速度嘅優勢，而且佢唔需要點走位做小組配合，又可以俾機會佢單打獨鬥，鍾意嘅就推順大位射死角。咁總好過逼佢打前鋒，波又攞唔到，帶波又無空間俾佢爆，場場比賽就喺度行行企企思考人生。依個方法可行性比較高，始終馬斯亞係打翼出生，基本上佢唔使點適應依個位置，一落場就識得踢。但有球迷會問咁普巴呢？佢依家打左邊打得咁好，而叫普巴打防中就等於令球隊處於下風。當然依家普巴踢得咁順就唔好變住，但球季流流長，球員狀態總有起伏，而且如果普巴唔踢左邊，可以俾佢踢柱躉式前鋒，以佢高大嘅身型同熟練嘅腳法，再加上靈活嘅頭腦，將會牽制到對方後防線。

二、賣走馬斯亞。聽講國際米蘭對馬斯亞有興趣，願意用5000萬英鎊買佢過去。其實好多球迷知道依個消息後，第一個反應就係仲唔賣走佢，咁對雙方都有好處。曼聯嗰邊固然可以收到一大筆轉會費，馬斯亞亦都可以喺新環境發展佢嘅足球事業，而且球迷亦都唔會再俾佢影響到睇波嘅情緒，後備球員又有多啲機會出場比賽，真係可以話係一舉四得。

三，主要喺杯賽時放佢落場。由於英超球隊對手個個都了解同識穿馬斯亞嘅打法同心理狀態，根本每一個後衛都有方法可以防守佢，所以就不如乾脆地搵馬斯亞專打盃賽，相信如果佢對住一啲唔熟悉自己打法嘅後衛仲有一啲用處。尤其曼聯前鋒唔多，但賽程又密，俾佢喺啲盃賽出場做輪換會係一個較合適嘅選擇。好似費格遜年代嘅法國翼鋒比利安同意大利前鋒羅斯都係專打杯賽，而且表現仲唔錯。



馬斯亞處於依家嘅境況，筆者相信唔係佢唔努力尋求進步，亦都唔係佢唔想改變佢嘅踢法，而係喺球隊入面好似無人幫到佢。蘇B成日安排佢要自己打前鋒，又無一套適合佢嘅戰術，再加上球迷亦都唔鍾意自己，所以馬斯亞都要為自己未來作打算，無論係為自己定為球隊，最理想就大家達到雙贏局面啦。