【突發】Eurofighter 正式發佈，製作進行中！


Heatblur 同 TrueGrit 合製，未有期。

繼續講雷達：

• RWR 唔似雷達，因為呢個系統係被動，可以接收 360 度嚟嘅訊號。現代啲嘅仲可以分到邊啲訊號危險啲，要機師注意先。
  
• 現代雷達，尤其係空戰用嘅，有好多模式「玩」，有啲可以偵測到多個目標，但只可以「鎖定」一個目標 -- 個雷達束只會集中射住一個目標，目標嘅動態就比較清楚，但同時亦會警示目標佢已經被針對。亦有另一個模式叫 Track While Scan （TWS），呢個唔單止用嚟偵測，仲有可以同時追縱多個目標，被「射住」嘅目標（們）完全唔會覺被鎖定！著名嘅 F-14 配 AIM-54 系「鳯凰」飛彈，用呢個模可以同時攻擊最多 6 個目標！當進行狗鬥/纏鬥嘅時候，雷達亦有特別嘅模，方便鎖上敵人。另一方面，現代嘅雷達亦可以單係偵測高速嘅物體，不過 DCS 好似仲未有機體有呢個模～
  
• 視距外（Beyond Visual Range BVR) 氾指可以攻擊 20 海里 / 37 千米 以外嘅目標，當然除咗要偵測到，啲武器都要去到咁遠先得。

講埋 ECM：

即然雷達咁好用，當然敵人嘅雷達要對付，有兩種方法：

硬殺 -- 炸鬼咗佢，除咗一般炸彈火箭之外，仲發展出專門對付雷達嘅反「輻射」飛彈。

軟殺 -- 令到雷達無效/弱化/混淆嘅裝置。呢度講同飛機有關嘅 -- 由最早嘅嚮飛機必經嘅航線度大灑鋁片，令到雷達收到極大量反射見到好多「雪花」，去到越戰時期都仲用呢招，各位聰明嘅老細，會發覺到一用到「多普勒效應」雷達會令呢招失效。而家有特別嘅電子裝置，通稱 Electronic CounterMeasure (ECM)，令到無咗雷達波反射/只有訊號方位但其他資料都無等等干擾手段對付雷達。

除非用電子戰專用戰機之外，一般搭載 ECM 嘅戰機，敵方雷達仍然可以以較強嘅功率輸出，「燒穿」ECM 干擾。而面對 ECM，亦可以以電波改變手段去反制 ECM，叫做 Electronic Counter CounterMeasure (ECCM)。但暫時唔覺有 ECCCM，還望指教。

DCS World 入面嘅 ECM 比較簡單，只能夠縮短敵方鎖定嘅距離，同埋影響咱機雷達嘅效能之外，有網友以為唔多真實，而且亦未有 ECCM 設置。

【新聞】公測版 2.7.5.10869 出咗，好鬼大個下載～ 詳情：
https://www.digitalcombatsimulator.c...a/2.7.5.10869/

好似雨霧同夜視鏡都未執番好。

二戰名機 de Havilland 蚊式戰鬥轟炸機 VI 型正式接受予訂，屬 Early Access （啫係好過公測版少少，不斷有新嘢/改良加落去），特價賣 42 銀花旗紙。未公怖幾時玩到，本人對啲舊 warbirds 無乜興趣，不過各卜位有興趣可以去望望。


https://www.digitalcombatsimulator.c...ules/mosquito/

講雷達唔噏埋武器，好似爭啲。粗粗哋補充一下：

雷達最早嘅用嚟引導武器嘅係飛彈，早嚮二戰末期，納粹用雷達引導地對空飛彈對付盟軍戰機。之後美蘇等國繼續開發，戰機搭載嘅飛彈都可以用雷達引導。

主要講空對空嗰啲：最早期嘅，係利用雷達指向，啫係支飛彈係「騎住」雷達波嘅方向，進襲目標，唔係噉好嘅好明顯，當目標越嚟越快，雷達又未必跟得切。後嚟嘅係接收雷達波由目標，反彈返嚟嘅訊號，自行修正航線。呢兩味叫做「半主動追蹤」飛彈。係就係做到 BVR，但問題係咱機要一直「射住」個目標，個雷達唔做得第二樣嘢。隨著技術進步，出現飛彈咱身都裝咗雷達，由載機指向，識「自己出去搵食」，做到「射後即忘」，咱機一來可以射完走佬，唔係噉怕對家「還拖」，二來可以同時「招呼」多個目標。

近代嘅雷達可以配合電腦同火控系統，可以指導唔係由雷達引導嘅武器，攻擊「鎖上」咗空中同地面上嘅目標，包括無引導嘅「笨彈」。

留意同好多電影電視動漫作品唔同，空對空導彈個火箭最多燒 4秒到燒晒，之後就無煙無火無加速，慢慢噉慢落嚟，加上能夠受嘅 G 力都係有限，無得係噉「扭嚟扭去」，事關噉扭法轉彎法，反而令到支飛彈更加慢。二則唔會同時間，射多過一粒飛彈向同一個目標；飛機唔係噉襟打，一般中距離飛彈嘅「彈頭」，可以一嘢擊落轟炸機咁大嘅飛機，細嘅紅外線飛彈，最多兩粒都夠數。原因近則要留返啲彈藥應付之後可能遇到嘅敵人，遠啲則亂嘥啲飛彈，不利補給，而每粒飛彈都用好多納稅人啲錢嚟買，情願第一劑唔中再補中，都好過明明一粒搞得掂又無無謂謂補多粒，上頭一定寫花個 file。「坂野馬戲團」係好睇好開心，但係唔係噉真實。

再補充：有老細問過，啲飛機做乜中幾彈就墜？飛機其實好脆弱，直昇機就更加。影響架機嚮得天度飛，主要有四個力：昇力、推進力、重量同風阻，最後嗰個呢度可以唔理，首先飛機要做得儘量輕，所以啲「皮」相對地薄，無乜裝甲保護，少數專職對地近戰支援嘅好似 A-10 同 Su-25 系，駕駛艙部份特登加咗鈦金屬裝甲，好似個浴缸咁，而現代對空武器都係以 20mm 口徑火炮起計，所以就算有保護都好有限，再者其他重要部位，都無乜保護，好似對翼同引擎，一個唔好彩有乜依郁，昇力同推進力事旦一樣無咗，部機就好易跌返落地。

OK，叫做找晒數，下個舖回返正題。

未講啲模組講嘅啲「公益」嘢。隻 game 大大話話都有成 10 年噉滯，加上個架構模組化，仲好多嘢都半公開，好多有心人都整啲嘢畀隻 game，令到隻 game 更好，絕大部份啲嘢都係免費，可以去呢度搵到：
https://www.digitalcombatsimulator.com/en/files/

呢啲公益嘢有致可以分成幾類：

1. 新機體
2. 工具
3. 塗裝
4. 視聽效果改良
5. 系統表演改進
6. 任務/戰役

新機體除咗飛機，仲有船艦、車輛等。主要講飛機，可以分：

• 獨立，無需借其他機體「做替身」
• 需要先擁有其他機體

第一種可以話係整部全新機體出嚟，全部嘢都要由頭做起，第二種比較簡單，主要係駕駛艙會重用，其他好似外觀可以係由無到有。留意返，ED 留返部份系統，好似武器，導航同無線電通訊嘅程式碼唔會公開，只會同授權廠家分享，呢類公益機體多數用返現行有嘅武器，而導航同無線電都簡化。大部份都可以由玩家操作，但有少部份只能由 AI 使用。

齋講可以揸嘅，獨立機體現有嘅（唔詳盡）：

• A-4E 天鷹
• A-29
• T-45 Goshawk 訓練機
• MB-339A/PAN
• Edge 540 / Extra 330SR 競賽機
• IA-58 FMA

要借其他機體嘅有：

• F-15 STOL/MTD
• F-22A Raptor
• F-35A
• F-117A
• Su-57
• Rafales
• EC-665 Tiger
• AH-64A Apache
• FA-18E/F/G
• 以色列版 F-16
• JAS-39 Gripen

仲有好多其他「誇張級」機體等等。

模組由 Heatblur 製作。機體係 70 年代瑞典製對地攻擊偵察兩用機。 特式係因為瑞典長期維持中立，同時担心當年蘇聯打起仗嗰陣會順便入侵（當時間唔中都有蘇聯潛艇「進出」其領海嘅新聞），個戰略構想係一旦啲本身機場唔用得，就靠公路當機場用。所以啲公路起嘅時候係特製可以變跑道，而戰機本身可以極短距離昇降，易於整補，好快整備好重新投入任務，因為預計會係數量懸殊，避免硬拼，係專執行「一擊脫離」嘅戰術 —— 跟足航點飛去到特定目標，掟晒所有彈藥之後就高速走返去基地。同一般「週圍打獵」嘅傳統戰機好唔同。

好：

• 因為啲功能唔算多（相對於多用途戰機嚟講），要學同記嘅嘢唔多
• 系統簡潔易明，中間個好大個一體化嘅：雷達顯示 ＋ 羅盤 ＋ 航點標記顯示 ＋ RWR 基本上係搞掂半數機師需要注要嘅嘢。
• 而個 HUD 亦簡潔，只有高度同指定航點有關嘅資料，或者係設換做武器錨準器。
• 幾乎係唯一原生機體中，可以做到低空音速巡航，噉嘅速度玩貼地飛行 —— 準確嘅講係離地 300 英尺以下，樹之間嘅高度 —— 非常刺激好玩
• 因為可以短距離昇降，起飛同降落機場都幾易吓，嫌難仲有埋自動降落輔助系統，亦係唯一可以蹆後行嘅戰機～有人試過，架機無勾都照樣降落到空母上面
• 唔止傳統機場，仲可以降落公路上面，窄到得兩條線嘅都得，雖則一嚟理論上所有艦載機都得（F-14 咁大架會有啲難），二嚟實際上噉玩法都幾難吓
• 可能係最強嘅反艦戰機，Rb-04E 同後繼嘅 Rb-15F 反艦巡航導彈唔只「射後即忘」，識自己搵食，射距遠同時彈頭又大。
• Heatblur 整同支援呢個模組可謂有口皆碑，唔止做得好做得接近原機，仲不時更新執 bug

唔係噉好：

• 所謂針無兩頭利，單一功能嘅戰機都幾悶下
• 無 A-10 拎到噉多彈同噉亮麗，武器選擇又有限，好少「智能」彈藥
• 空戰能力係有，不過機身無機炮之餘，只能夠用舊式紅外線導彈，幾乎只係做到防禦，撞正新啲嘅戰機好多時只等被屠殺
• 全機用晒瑞典文，啲讀數又係公制，飛慣英美戰機嘅會有少少唔慣
• 航點設定係任務設計同執行時候，要做得同跟得準同精細，噉「困身」未必人人鍾意
• 全機系統另一個靈魂係部導航電腦，因為介面係 analogue 式，用起嚟要一啲時間適應~
• 唔知點解，架機走落去啲草地會卡住，要 AB 全開先甩到身。

主頁：
https://www.digitalcombatsimulator.c...planes/viggen/

AJS-37 補充：

• 有啲似而家民航客機嘅設計，引擎出口兩邊各一隻活門，降落前拉一個手掣，當機鼻個轆掂地嗰下，活門會封咗個引擎噴氣出口，噴氣會反彈到機尾兩側嘅出口，變成逆向氣流，令到架機慢落嚟，停定再可以蹆後行。後繼機 JAS-39 反而無咗呢個功能~
  
• HUD 除咗導航同武器瞄準模式，仲有雷達輔助降落，目視降落同偵察模式，全部都簡潔但資訊齊備
  
• 不過全部 HUD 顯示都無速度資料，不過以其戰術應用，除咗降落之外，基本上都係飛得有咁快得咁快~
  
• 個 AB 唔係得開同熄，係佢有三段 AB，每段嘅推力會多啲，噉做可能會慳油啲～
  
• 呢部係少數無得玩空中加油嘅戰機~
  
• 呢部機仲有個好特異嘅武器 Rb-05，可能係唯一一種可以手動追踪嘅飛彈。發射之後，機師可以用標板上一個細嘅操緃掣，以目視經無線電遙控，支飛彈嘅左右高低（玩家亦可以配去現實嘅 joystick 操控），彈尾有盞燈幫機師望到支飛彈，可以兼對空對地攻擊，因為無需鎖定，目標基本上除咗廻避，都無乜法子反制，絕對係偷襲利器，係幾過癮吓，不過支飛彈實情係好快吓，要用熟係好難吓
  
• 講到武裝，唔似 F/A-18C 同 A-10 噉,部機有啲好奇怪嘅限制，啲對地武器唔可以就噉 mix-and-match，好似飛彈同炸彈唔可以一齊拎，唔跟最後會有其中一樣唔用得，最好都係用預設好嘅武裝配搭，唔係就要睇說明書。

【新聞】AH-64D 長弓阿柏奇，外觀予覽影片發表：


F-14 模組特價：

【新聞】最新公測版更新出咗，內容：
https://www.digitalcombatsimulator.c...a/2.7.6.12852/

重點：

• 蚊式戰鬥轟炸機登場！！！
• F-16 可以作雙目標追緃 (Dual Target Track)
• 英倫海峽地圖大量更新，當中包括冬季貼圖
• Mi-24 大量更新
• 當然仲有好多除錯項目

【新聞】新公測版釋出，詳情：
https://www.digitalcombatsimulator.c...a/2.7.6.13133/

有新公測版，不過只係啲 hotfix 嚟～
https://www.digitalcombatsimulator.c...a/2.7.6.13436/

隻 AH-64D 仲未有予約個期。

【特報】AH-64D 長弓阿柏奇直昇機現已接受予訂。


詳細：
https://www.digitalcombatsimulator.c...odules/ah-64d/

【更新】公測版更新出咗，非常之多嘢，重點有：

• MiG-21bis 有多兩個戰役
• AIM-120 而家有埋慣性導航
• 任務編輯器多咗日月升降時間顯示同注明等新功能
• F/A-18C Lot 20 完成「油門」自動操作降落模式
• F-16C 加咗地面同海面雷達模式
• F-14 送多隻空母 CV-59 Forrestal，不過唔係超級空母式，好過冇～ （更正：人人都有份，隻艦係由 Heatblur 製作）
• F-14 新加咗可以由機師位，命令 RIO AI 設定 LANTIRN嘅功能，咁就可以單人都做到精準轟炸，唔洗跳唔跳去；同時亦附送有相關嘅訓練任務
• F-14 飛行模型重大更新

詳細：
https://www.digitalcombatsimulator.c...a/2.7.7.14727/

【新聞】「萬聖節特價」進行中，部份貨品低至半價，今次連舊啲嘅戰役都有特價。去到 11月 2號。

真係要寫多返啲介紹。因為至從 Quest 2 整 sharp 咗個畫面之後，享受好咗好多（雖然被擊落得仲多）。本人有嘅模組又極有限，左諗右諗，都係講隻 F-14 。

多得套電影，架機可能係現實戰機之中，最為人知嘅一部。呢個模組畀兩部機揸：F-14A-135GR （系列後期型），同埋最後使用嘅 F-14B。除咗 A 型嘅引擎出力比較弱，同外型有好少分別之外，A 同 B 嘅「玩法」基本無分別。

聽講好多人，玩咗排 F/A-18C （或者 F-16C）嘅，第二架就係呢部。要學其實唔算多嘢，又唔算好難，但係要上手絕對唔易。都係先講咗啲好嘅先。

呢個（又係）由 Heatblur 製作嘅模組，創咗個先河 -- 唔因為佢係部雙人機，仲可以兩個人線上一齊「揸」，單人玩又可以跳前跳後，最重要係單人模式嗰陣，同機另一位就係 AI 控制，玩家可以用一個好特別嘅選單畀命令 AI，坐後面嘅 AI 叫 Jester，前面就叫 Iceman -- 熟電影嘅知係乜水。作為「艦隊守衛者」，或者專職攔截機，除咗無頭盔顯示、FBW 同埋 AIM-9X 呢啲「先進」嘢，其他表現都比 F/A-18C，甚至有啲仲比 DCS 嘅 F-16C 優異，Heatblur 重現到機艙環境同性能真實感重現。連著名嘅 AIM-54 「鳯凰」飛彈，都有三種型號可以用。

冷戰結束之後，軍費大減令到多任務戰機興起，呢度都有埋對地攻擊功能（通䄴「炸彈貓」Bombcat），但現實中從未使用過。當中除咗各大少無引導炸彈之外，只得激光引導炸彈可以搭載。係無 F/A-18C 同 F-16C 咁「齊備」。

因為無電腦中間「協助」，部機亦同第四代嘅相反，呢度著重機體隱定平衡，所以空戰嗰陣一啲唔易，機體會因為過高攻角過低速而作出反應，亦相對易墮入失速，過度嘅操作好易折斷主機翼，不當使用襟翼會導致損壞，亦要配合機舵嘅使用，個 HUD 都算幾齋（又無 AJS-37 咁少嘢）飛緊時都要望返啲儀標；雖則出力重量比相當出色，有人比諭為揸二戰時代嘅機體（「戰鳥」Warbirds）嘅感覺，駕駛技術同攻角管理要求非常高 -- 好在未到 F-104 噉變態，呢方面要好多時間浸，玩得熟練識用嘅話，滿足感分分鐘比揸 F-15C 仲要高。

唔係噉好嘅，開頭個 AI 好多問題被人垢病，尤其係 Jester，因為大部份時間玩家都會坐住機師個位，後面 RIO 就由 Jester 負責。Jester 唔止好多吐糟位（全部真人配音），一見勢色有少少唔對路，仲會自行「跳機」走先，有人激氣到整咗個 R2D2 mod，結果後面變咗 R2D2，唔會自行走佬，不過同時又少咗啲補助功能，而家個 AI 好咗好多，功能更多，之後嘅 Hind 同嚟緊嘅 AH-64D 都用上類似嘅 AI 機組人員。關於 RIO 嘅種種，之後再講。

https://www.digitalcombatsimulator.c...odules/tomcat/

（續上）：
機師坐前面，除咗要揸住架機，亦係負責射擊，亦有限度使用雷達同電視攝影機做搜索。後座嘅 RIO (Radar Intercept Officer)，唔係啲電影入面，只係個乘客兼啦啦隊，而係主要負責用個雷達搜敵，分辨敵我，用無線電通話，導航，對地武器管理，控制外掛紅外線/雷射誘導系統，以至空中纏鬥嗰陣，肉眼搜索同報告敵機動向，以及架機嘅速度，作用好大。另一方面，亦只可以由 RIO 個位，當用 TWS 模式嗰陣，同時追蹤 6 個唔同目標，向每部敵機「餵」一粒鳯凰飛彈。

追加：因為昇空重量限制，由空母出發嘅，最多只能戴 4 支鳯凰飛彈，只有陸上昇空嘅可以載齊 6 支。

公測版 2.7.8.16140 已出，主要執過 AIM-120 感應器嘅效能，同埋 Mi-24P 模組嘅更新；仲未有 AH-64D。詳細:

https://www.digitalcombatsimulator.c...a/2.7.8.16140/

啱啱完咗特價無三個禮拜，而家又特價，仲要去到下個月頭 ６ 號~ 真係好等錢洗噉喎。

續返講套 F-14，如果玩熟咗 F/A-18C，想「升級」，或者想試吓其他嘢，F-14 係咪好選擇？以本人有限嘅見解，未必，打空戰好炸嘢都好，部機好蝦人揸，出力強大之餘，仲有好多嘢要手動，系統同武器都比較老舊，雖則鳯凰飛彈威力真係好誇張，要同時間兼顧好多嘢會令人好忙，個 AI 係仲有問題，到而家都 OK 嘅，但有人願意拍你一齊飛會好啲；炸嘢嘅武器選擇唔夠 F/A-18C 多，引導武器齋得激光炸彈一種，以前仲要人手由 RIO 位去做，不過而家有人改到可以由機師位做，同埋 Jester 都幫到手。

有人話 JF-17，或者幻影 2000C 會好啲，不過呢兩套本人都無，無法置評。

追加：

• 架機上面有部叫 "Walkman" 嘅嘢（可能係嗰陣時嘅潮物）可以播歌，仲可以自己加歌上去，一邊打一邊聽
• 可變角度翼，唔似同時代嘅蘇俄機咁，係自動變，會跟架機嘅速度而轉，但可以手動 override，空中纏鬥嗰時候幾好用，不過噉做部機快嗰陣都係會變。
• 有幾套要畀錢嘅戰役都好好玩，推介 Zone 5，由前 F-14 機師教你揸 F-14A 空戰，有做 Top Gun 嘅味道，不過有要埋內華達州地圖先玩到。

F-14 仲有咩唔好？前面兩條框太粗，影響視線，空中纏鬥嗰陣好唔方便，比 F-15 同 FA-18 嚴重好多。另一樣係個 RIO 係有時幫到手話你知敵機方位，但好多時老點噏錯，仲有陣時架敵機已化咗火球，仲嚮度好緊張咁嗌～ F-14 部機比 FA-18 大同重，降落同空中加油都果難好多。

如果玩開 FA-18，想試新嘢，本人推介 AV-8B NA。下次再講。

又⋯⋯特⋯⋯價⋯⋯去到出年一月十號～～～

予告大約廿二號，公測版會有大更新。

較早前講話要順延一日，廿三號先有更新～