DCS World ｜數碼戰鬥模擬世界 - 又特價，去到 3 月 26 號

[肉羊哩咖]

玩咗一排，都係時候開始寫啲嘢。因為套嘢實在太大，會不定期慢慢寫。

首先，呢隻 game 屬於傳統模擬類，唔似 Ace Combat 系咁噉著重遊戲性同聲色表現，比較偏向真實性，同埋身處戰場嘅感覺（啫係悶）。再加上軟硬件嘅好有要求，上手嘅門檻好高吓。

如果未被本人嚇走嘅話，咁呢隻 game 係乜料 -- 基本上係玩家駕駛一架機體，參與一個自訂/他任務（未必係包含戰鬥），或者一場由多個任務組成嘅戰役。重點係玩家享受接近真實駕駛某機體嘅樂趣，可以話係 MSFS 嘅戰鬥版，有人話論機體像真度，有過之而無不及。除咗玩家可以自設任務同戰役之外，有多人連線模式，亦可以自設伺服器。

隻 game 基本系統係免費嘅，當中包括一個地圖同兩架玩家可用嘅戰機（之後再講）。分 Steam 版同獨立版，兩者玩嘅時候無分別。Steam 版只能玩從 Steam 下載/購買嘅組件，VR 亦只能用 SteamVR；獨立版由開發商 Eagle Dynamics 網站下載/購買嘅組件，亦可以玩 Steam 版經轉換後嘅組件，而 VR 不限於用 SteamVR。

隻 game 特式係模組化，因應玩家嘅興趣（同財力），加減遊戲嘅內容，模組主要有呢幾類：

1. 戰機
2. 非戰機嘅交通工具
3. 器材/配件
4. 地圖
5. 戰鬥任務同戰役

下載同買可以到呢個網站：
https://www.digitalcombatsimulator.com/en/

[肉羊哩咖]

齋講無謂，睇吓最新嘅 2.7 版係點，全部係實 game 畫面，全無 cut-scene：


佢啱啱公佈咗，玩家可以每六個月試玩要錢嘅模組（戰役除外），每個模組可以免費任玩2個星期。新玩家買首個模組有半價優惠～

[肉羊哩咖]

系統就要求有配備 Win10 嘅 PC，最好 i3 以上嘅處理器，有 8GB RAM。話就噉話，你要玩多人對戰、VR、某啲地圖或者複雜龐大，好多嘢同時發生緊嘅任務，最好起碼有 i7 CPU，同 16GB，有部幾快嘅 SSD 同張勁嘅 graphics 咭。

輸入就由鍵盤、滑鼠、joystick、手掣、HOTAS 都支援。輸出就由一個芒，去到三個，甚至再誇啲玩埋獨立 MFD (戰機上用嘅多功能顯示屏）都得。同樣支援愛飛人仕愛用嘅 TrackIR。

而本人覺得投入度最高嘅係 VR，佢支援 Steam 同其他大少 PCVR 系統。你係可以用 VR 手掣扮隻手，不過絕少人咁玩，都係返 HOTAS，有人甚至為咗噉開發咗隻滑鼠戒指，VR 可以係個專題有排講。

維持住一貫玩模擬嘅傳統，錢坑嚟嘅～

[肉羊哩咖]

補充：仲可以用 追踪手勢嘅 LEAP，同 Capto Glove 。玩得再投入啲，可以整埋張 VR 活動椅，搞到好似玩 Afterburner 咁，例如： Yaw VR，不過地方要夠大先～

英國有間公司（應該叫機舖），有兩張呢類 3D 椅畀人租嚟玩 VR。


追加：夏季特價進行中，去到7月12號，模組由減十二美金到半價不等。

[肉羊哩咖]

真失禮，連主網站都冇擺出嚟～

咁，可以玩乜？

• 齋飛，享受高空嘅「寧靜」，同操控飛機嘅樂趣，睇風景就一般，畢竟個地形引擎都好多年，講細緻度，同天氣系統唔及 MSFS2K，雖然架機絕對像真過後者，有人甚至以為後者只係玩玩下。
  
• 好多人玩都係貪佢有得打。單機一個人玩，或者參與多人一齊玩亦得，可以對 AI 或者另一班玩家。當中可以有人担任 game master 主持。
  
• 玩單純隻揪/群揪。因為可以個人整個專用 server，呢隻牆國好幾受歡迎，見唔少簡體字 server。
  
• 訓練 -- 好不幸，好多部機體都要學，要浸，練習到熟練玩得投入。唔似 Ace Combat 噉一買返嚟可以即玩，由於像真度幾乎似足真貨，好多時齋讀熟部說明書唔夠，好多時要上網睇片學，又要玩啲訓練任務，甚至可以約人網上教你～
  
• 教練 -- 你夠熟可以教人，特別係有唔少機體係雙座位，可以兩個人同時坐一部機，一個教，一個學。據報由於呢隻 game 夠真，連美軍都用嚟教學用。
  
• 拍片：有好多人玩之餘，鍾意將啲玩嘅紀錄剪剪埋埋出條片出嚟畀人欣賞，慢慢發展另一門「藝術」。Eagle Dynamics 故然係個中高手（咱家嘢都整唔靚搵鬼買咩），有好多業餘嘅都整啲好正嘅片出嚟，仲有人搞唔少影展。唔講噉多，放兩條人哋嘅傑作出嚟畀各位老細參詳下：
  
  
  
• 整任務。隻 game 包含個好強大嘅任務/戰役製作器，可以話係 game 中 game，玩得精嘅佢支援 Lua scripting。啲有心人整咗好大量免費任務放出去任人拎嚟玩。
  
• 玩改裝。另一個有心人嘅公益項目，細到由改善影像音效，加新嘅機體塗裝，大到整啲由無到有，全新嘅機體艦艇都有，拍得住賣錢嘅唔再講，絕大部份都仲要係免費！呢個有機會再講。

[肉羊哩咖]

漏咗一樣，可以玩花式/編隊飛行，好考合作性同技術，同 AI 和/或真人一齊飛，不過 AI就～～～

Steam 版部份模組，同期特價中。

[肉羊哩咖]

公測版更新。其中多一個免費地圖 Marianas！係中太平洋一系列島嶼，其中有美屬關島塞班等等，現代（咳，有留意國際時事都知某大國好想染指嗰區）同二戰場景都啱。



（真係要寫寫啲模組介紹）

[肉羊哩咖]

先講啲數量最少嘅先：地圖。

唔似 MSFS2K，佢可以玩嘅地圖實在好有限，連天氣系統都好簡單，而家玩到嘅只有呢幾個：

克里米亞（免費） -- 可以話係元祖地圖，主要包括格魯吉亞，黑海東部，俄國南部同烏克蘭南部，係有埋克里米亞地區，不過因為政治敏感嘅關係，只係得個海岸線～

波斯灣（ED 製作，收費）-- 主要包括阿聯酋，安曼，同伊朗中南部，仲少少沙地，伊拉克同科威特。後面三個都係得啲海岸線，上面乜都無，所以有人話應該叫「霍爾木茲海峽」。其中杜拜市區建築物都整得好靚。

內華達州試驗兼訓練中心 NTTS（ED 製作，收費）-- 暫時唯一個美洲地圖，主要係圍繞住「紅旗」空軍訓練中心，Top Gun School，Area 51，仲有拉斯維加斯同胡佛水壩。

諾曼第 1944 （Ugar 製作，收費）-- 第一個以二戰為主嘅地圖，包括英國南部，英倫海峽，同法國北部，主要諾曼弟登陸戰役相關地區，比較舊。可以話畀之後嘅英倫海峽取代。

英倫海峽 （ED 製作，收費）-- 比上面嘅細，但地圖名勝地標落得更足，尤其係多佛地區。可能係由於係咁多個之中嘅最細，幾乎只合二戰戰機同直昇機使用

敍利亞 （Ugar 製作，收費）-- 可能最大嘅地圖，有以色列北，兵家必爭嘅戈蘭高地，約旦北部，敍利亞西部（連大馬士革），黎巴嫩全境，土以其南部，最近免費加埋有塞浦路斯島。今次 Ugar 落足料，唔好話好多名勝都有 -- 好似舊年貝魯特被炸咗個貨倉，阿薩德個「皇宮」；仲有好多古蹟等你去搵～

由於個地形由 2012 年沿用到而家，同 MSFS 2K 比，無論準確度同細緻度都差一大截。不過你玩得 DCS，都唔係齋飛嘅啫～

追加：原來新圖 Mariana Islands 係用咗新引擎，好咗，有人拎 MSFS2K 做比較：

[肉羊哩咖]

都係要入「正題」，都要講識飛嘅模組～

用家飛得嘅可以咁分法：

• 翼：定翼機 同 旋轉翼機（啫係直升機）
• 動力：活塞式 同 噴氣式
• 時代：二戰，非戰機， 同 第一代、第二代、第三代、第四代噴射機 -- 正式嘅係去到咁，下面有解
• 飛行模型（Flight Model）精細度：檟準（SFM），外掛（EFM），先進（AFM）同 專業（PFM）
• 機艙可動度：標準系統模型（SSM）同 先進系統模型（ASM）
• 製作：咱家（ED）製、第三廠製、或者係用家自製

標準系統模型（SSM）同 先進系統模型（ASM）嘅分別，前者好似以前嘅模擬咁，啲功能全部要用鍵盤和或 joystick 輸入，功能好多都簡化咗，但係個儀器板齋得個睇字；後者七成以上嘅掣都撳得啪得扭得，即使啲掣完全無用/未寫到可用，可以用滑鼠同 VR 手掣同手套操作，另一方面，成部機全真嘅好似 -- 啫係要撻著部機，快嘅都要三五分鐘，唔熟嘅要搞成十幾分鐘～

而飛行模型嘅分法，係表示部機幾像真。SFM 只係依參數睇數字，唔多準，尤其係啲機可以唔會失速唔會失控；啲 AI 機全部都係用 SFM。EFM 同 AFM 比較精準，尤其第三廠出品部份會做得更精細（好似 F-14A/B），PFM 係 ED 專利，佢拎到啲「解咗密」嘅風洞測試數據資料，轉化成編程，

以上兩樣，詳細啲解說可以睇呢度：
https://www.digitalcombatsimulator.c...787493#1512209

由於數據來源嘅關係，DCS 入面啲機體，特別係賣錢嗰啲，只會有啲唔再係第一線嘅機體。雖則好似唔多吸引，但包括咗好多歷代名機。跟住會逐啲嚟講。

[s2001154]

之前我都開過不過香港真是無人玩這個
成件事純KB Mouse玩都得
自製cockpit玩又得
我自己用緊TM Throttle + TM MFD + VPC stick + TPR rudder + 藍芽指環 + Aimxy + KB玩
控F18基本上都舒適
VR唔係好得
用過Valve Index搞其實好辛苦
有線果D好影響
無線的可能才較好一點不定
而且VR hand操作完全未得 用返Mouse無咁嬲
communication用MFD搞唔錯可以減少使用KB
呢隻野真的好花時間去學習
既是遊戲又不是遊戲
好多空戰事情都可以試

[肉羊哩咖]

回上：

• 反而「墻國」好鬼死多人玩，因為唔止有 J-11 （又叫「殲11」，本人用返英文），「墻國」仲有檔嘢出啲戰機模組，有檔嘢出啲戰役，個風格好鬼 Ace Combat，仲搵有份做配樂嘅合作 -- 睇佢夠唔夠胆死出台海地圖⋯⋯
  
• 本人只係用成套 TM T16KM + Throttle + Rudder，再加個 trackball 當手指喳，啲友玩 VR 嘅好推薦隻 PointCTRL，加多個追蹤器去個頭罩，用手指當老鼠用，但好鬼貴，有興趣可望望：
  https://pointctrl.com
  
• 都係走唔甩，要講講：本人用 Quest 2 有線玩，Airlink / VD 都唔夠條 2.1Gb 嘅線順，反正坐定定嚮度無乜所謂，部手提機只得 RTX 2060，都勉強勉強啦，要有 35 fps 以上，啲儀標板用 VR Zoom 都睇得清嘅。另：有好多人話 HP 部 Reverb G2 勁 sharp，不過本人覺得部腦䞷碼要有 3080i 先好諗，而部 HP 好鬼死貴～ 想玩得順暢，好多設定搞，初初又玩又試，前前後後執咗成兩三個月先滿意（半放棄亦唔想再煩），不過係好值嘅，VR 唔止臨場感無械可擊（部 F-14 同 A-4E 飛到震嘅時候你真係會驚），SA 好過用 TrackIR 好多，你玩過唔想返去望住部芒；個罩幾貴都平過你整三個芒加埋件 TrackIR，用墻國品係平啲，但本人點都無乜位放 3 個廿四吋芒；本人近日手㾗開始試直升機嚟玩，部 Huey，嘩，，嚮樹之間飛過都幾過癮㗎；而啲人話用 VR 嚟降落易好多。
  
• 本人當係好似賽車咁，呢個係件對個人技術器材要求好高嘅 game，要磨要浸，幾似都好唔係真嘅，有前 F/A-18C 飛行員兼玩家兼 Youtuber 證言，而有好多人拎隻 game 嚟當體育 game 噉玩嘢，有機會放啲例子，呢個係平民用錢可以買到最高級別嘅模擬，尤其你係戰機迷基本走唔甩。本人之前玩過其他戰機模擬，亦揼低咗好多年（咳），呢個都係因為有咗 VR 先返去，點知⋯⋯
  
• 追加：用 VR 飛，屋企人見到會覺得好怪，唔似玩 Beat Saber 噉，都係對手 fing fing 咁啫，炸地面望住前面都話，空戰緊成日個頭要拎嚟拎去，頭岳岳咁，唔知做緊乜～

[肉羊哩咖]

如果玩開 Ace Combat，又或玩好似 Elite Dangerous Star Wars: Squadrons 之類嘅，想玩啲比較「像真」嘅模擬；可惜跟埋免費嗰兩部機，Su-25T 同 TP-51，前者適用於對地攻擊，後者只係教練機。如果鍾意現代空戰嘅，畀錢買架機無可避免。

如果唔想一下子要記好多掣嘅，好多人推介 Flaming Cliff 3:
https://www.digitalcombatsimulator.c...laming_cliffs/

裡面有成 7 部機：

• A-10A
• F-15C
• Su-27
• Su-33
• MiG-29A
• MiG-29S
• Su-25

全部現代噴射機，空優對地多用途海空軍有齊。雖然會機艙入面啲掣全部唔識郁嘅，不過幾乎架架都係 PFM，啫係有實機嘅風洞數據，像真度極高。加上感應系統同武器系統都無偷工減料，所以幾抵玩。呢個舖上嘅時候仲係特價中，賣緊 US$24.99 。不過錯過咗都無問題，佢年中都有幾次做特價。未買又可試玩兩個禮拜先，都幾「毒」吓㗎～

如果唔係部部機都噉啱老細嘅胃口，啲機可以逐件買，特價緊賣 US$7.99 。

本人因為 N 年前玩過ED 出，唔係 DCS 系嘅 Su-27，雖然而家嘅改進咗咗好多，但興趣無乜，呢度只有架 F-15C～

老實講，本人有嘅機其實好少，講咗有嘅先～

[肉羊哩咖]

ED 開發，舖嗰陣仲係嚮 Early Access 「早買早享受」階段，呢年放風話差唔多完成可以跳去正式出街。

本人同好多人一樣，如果有玩開其他「硬芯」模擬嘅，或者玩熟咗 FC3 啲機體之後，想進階去「先進」啲（啫係煩好多）嘅機種嘅，呢個「大黃蜂」會好啱做第一部機。機體解說呀，開發史呀，留返自己/睇有心人嘅嘢，費事悶親各位老細。

好處：

• 海軍戰機第一台線控飛行系統（Fire-by-wire FBW)，電腦會參考機師想做出嘅動作，再根㯫機體飛行狀態，控制/調整機體各個可動控制面，既做到機師嘅指令，又保持到部機唔會墮。就係噉架機好難失速失控，連萬一唔好彩玩出 tail spin，都有系統救部機～所以新手嚟講相對易上手。
  
• 「玻璃機艙」，有三個多功能顯示器（multi-function displays MFD)，絕大部份資料 -- 武器系統選擇，雷達，地圖，縱合狀況顯示，紅外線電視等等，同功能都可以經 MFD 搞掂，記少好多掣（雖然都有好多嘢要記）。
  
• 抬頭顯示器（head-up display HUD)，可以話 DCS 咁多部機中，最好用又同時最簡潔（你睇過 F-16 嗰個就明）。唔止，佢仲有頭盔顯示器。
  
• 多用途，因為取代 F-14 同 A-6 等機體，部機可以担任所有攻擊任務：由對空到對地嘅；由短中長程嘅對空飛彈，「蠢」嘅空投炸彈同火箭，一般飛彈同反雷達發彈，激光引導炸彈，「聰明炸彈」JDAM/JSOW，反艦飛彈，統統有得畀你玩 -- 亦即係話要學齊有排你學。
  
• 叫得做艦載機空母操作走唔甩，雖則基本系統包埋嗰個空母比較簡略，但係降落呢吓絕對極富挑戰性。
  
• 仲有咩比降落空母更難？空中加油咯～絕對挑戰你套架生同技術同耐性～
  
• 性能方面，絕對唔係「週身刀無張利」，BVR 空戰未必最強，但打埋身戰（dogfight）能力絕對唔弱。
  
• 呢個比較細嘅，係個起落架幾硬凈吓，因為要空母升降，令到嚮一般機場跑道升降易啲，甚至降落去公路同啲草地上面都無乜問題。
  
• 簡單一句：絕對「抵死夾大件」～

唔係噉好：
無乜，要數係個引擎；雖則有雙引擎，但反應好慢，明明推到去後燃器(afterburner 燃料直接噴去引擎出口個位嚟燒，以增加出力），但副引擎都要過成兩三秒先到。

詳情：
https://www.digitalcombatsimulator.c...planes/hornet/

仲有，好多人叫大部份掣郁得嘅，唔叫 ASM 叫 Hi-fi，SSM 嘅叫 Lo-fi，本人都係跟返廠噉分法

[s2001154]

我好肯定PointCTRL唔夠呢隻是鬼彈藍芽手柄準
我夾埋JoyToKey用基本上可以無KB控F18
用過幾次VR其實好辛苦真是.....
ValveIndex都覺得像素唔夠又要擺好兩個sensor做6dof 又重又焗又熱
RTX2070super行VR都掩唔少畫質同preload先逼到144fps
Aimxy真是最o岩用來坐定定頭追
用來玩埋F1201X同rFactor真是掂
Aimxy有個問題在充電module好易壞充電
不過有一換一服務零費用收貨

https://item.taobao.com/item.htm?spm...cket=14#detail

https://item.taobao.com/item.htm?spm...cket=14#detail

[肉羊哩咖]

Aimxy 咪係 TrackIR 個國產版咯，好多人用，但都係爭 VR 少少，加上本個所謂芒得嗰 15吋～不過有啲面罩真係幾重，Quest2 真係輕啲平啲。 隻藍牙介指幾有興趣，平平地無傷肝。

[s2001154]

作者: 肉羊哩咖

Aimxy 咪係 TrackIR 個國產版咯，好多人用，但都係爭 VR 少少，加上本個所謂芒得嗰 15吋～不過有啲面罩真係幾重，Quest2 真係輕啲平啲。 隻藍牙介指幾有興趣，平平地無傷肝。

Aimxy當然唔係TrackIR啦
一個用藍芽+Gyro一個用紅外線架

[肉羊哩咖]

了解，係咪可以拎轉頭㗎？

[s2001154]

作者: 肉羊哩咖

了解，係咪可以拎轉頭㗎？

基本上同真是坐在cockpit差唔多
彎腰 shouldercheck都做到
自己改個cockpit area大過玻璃罩可以穿埋出去睇
要手動回中的頻率都比TrackIR少
當然玩DCS一定要用曬3粒
玩ETS或其他車類一粒都夠
Aimxy話搞緊新版不過到現在都未見影......

[肉羊哩咖]

本人都係用 VR 為主，有興趣 TrackIR/Aimxy 嘅不妨睇睇。

而支 joystick 介指睇個樣當滑鼠用當然準，不過一手要揸支棍又要用隻超大介指，要試過先知便唔便；未用過 PointCTRL 無得講，不過用過嘅都無大問題，應該 OK 掛，不過都係太貴落唔到手。

[s2001154]

作者: 肉羊哩咖

本人都係用 VR 為主，有興趣 TrackIR/Aimxy 嘅不妨睇睇。

而支 joystick 介指睇個樣當滑鼠用當然準，不過一手要揸支棍又要用隻超大介指，要試過先知便唔便；未用過 PointCTRL 無得講，不過用過嘅都無大問題，應該 OK 掛，不過都係太貴落唔到手。

VR手果D真是太貴
要setup都好煩
用藍芽指環最高CP

[肉羊哩咖]

有兩個幾好用嘅免費工具 app，一個係 DCS Updater Utility，除咗方便你開唔同版本嘅 DCS World，仲可以分別開 VR 同 2D 版，可以更新、修補、還原 DCS、轉換 VR 系統、起 server、模型撿視、仲可以開相關嘅工具 app。

下載：https://forums.eagle.ru/applications....php?id=222020
正式討論：https://forums.eagle.ru/topic/134493...r-gui-utility/

另一個係鍾意玩空戰嘅老細必備，叫 Tacview，只要你有 save 低啲遊戲紀錄片，可以載入去呢個軟體去撿視各機嘅飛行軌跡，唔只用於教學，亦可以做賽後撿討。

下載：https://www.tacview.net/download/latest/en/
討論：https://forums.eagle.ru/topic/116593...ficial-thread/

------------

另：原來 ED 今次大發善心，嚮個 Mariana Islands 地圖入面，靜雞雞噉加咗個「練靶場」，畀人練掟炸彈火箭導彈用。位置嚮 CT97 區一個叫 Faralona de Medinlla 嘅小島上面，幾隱蔽吓。

[肉羊哩咖]

消息兩則：

1. Ka-50 Black Shark 係第一部 DCS 入面同時係 PFM 同 ASM 嘅機體，而家係第二版，噚日正式發怖第三版製作進行中，未有期。本人試玩過唔係噉鍾意部機啫～
   
2. 而諾曼第地圖更新進行中，會嚮下一個公測版度上埋，不過呢個本人又無買～

[肉羊哩咖]

Okay，如果啱啱買咗架機，要做啲乜？

1. 唔洗講噉多，裝咗佢先，Steam 版同單體版做法有少少唔同，唔同嘅模組大細唔同，不過都要啲時間。
2. 睇吓本說明書，ED 出品都有下載埋「本」 manual，有啲第三廠出品無跟埋，好似 F-14 咁，要另外去佢個網站下載。
3. 如果本 manual 都講你唔明嘅，可以去搵搵著明嘅 Chuck's Guide： https://www.mudspike.com/chucks-guides-dcs/ 佢除咗 FC3 嗰幾部機無之外，差唔多全部有齊，講得好深入淺出，你有心學某一個系統，一樣武器嘅話，都唔難跟住做，佢仲會更新吓啲內容。
4. 齋睇字都唔得嘅，睇片喇！ YouTube 上面大把教學，有啲好似 Grim Reapers 噉部部機，各個武器同系統都介紹同教，有啲好似 Prez 同 Iain Chrisite 噉專注一兩部機，或者一類武器 -- 後者專門教用「蠢」彈同火箭。不過有啲模組不斷「演變」中，啲片有時會過咗期唔再啱，有啲教學唔夠全面，跟住嚟做可能仲亂～
5. 另一樣好緊要嘅係操控，先要設定好基本操作嘅軸，你有套勁嘅 HOTAS 好，齋用鍵鼠嘅都好，都要設定好呢樣先，跟住搞啲掣用嚟做啲乜。呢度要跟每個人用嘅系統，興趣習慣偏好而好唔同，當然網上都有好多人 share 佢哋用嘅設定，貪方便可以下載嚟試用再改，點都好，要整件啱自己嘅 mapping 都幾花啲時間。
6. 玩訓練任務：有啲模組會跟啲有聲，甚至有啲有片嘅教學任務，有啲好似 A-4E 同 F-15C 無嘅，就網上有好多免費嘅可以拎。
7. 當然要勤啲練習，或者上啲群組，論壇同 Discord 搵人教，本人無試過，唔知有冇人要收錢。

[肉羊哩咖]

漏咗，ED 都會出咱家教學片～

最新 OB version 2.7.4.9632 出咗，齋更新個 file 超大，睇你有啲乜而定，本人嗰下有成 20GB 咁滯。改咗啲乜詳見：
https://www.digitalcombatsimulator.c...ews/changelog/

部份重要項目：


玩公測版係無噉穩陣㗎啦，不過「早用早享受」，尤其早排由 2.5.6 -> 2.7 啲新嘢又多又極度吸引，佢又畀你同時裝穩定版同公測版嘅，有空位無所謂。

如無意外，下個舖還債，噏少少雷達嘅嘢。

[肉羊哩咖]

首先，對唔住，而家先發現 s2001154 老細晨早出咗棟樓，積重難返，sorry sorry。

之前噏 Netflix 套高達時候，噏咗堆關於感應器嘅嘢，呢度繼續，主要圍繞住 F/A-18C 為主講。

首先開咗個防護罩先 -- 本人唔係工科出身，都係跟啲說明書同睇啲片嘅啫，獻醜，有錯麻煩請指正。

雷達，可以話呢幾十年最重要嘅偵測工具，尤其係空戰方面。有人以為中途島一役，因為日艦無雷達而美艦有，導至日方慘敗而逆轉成場戰爭。

雷達好簡化噉嚟講，一 part 係射出束無線電波，當啲電波撞到嘢反彈返轉頭，雷達另一 part 會接收啲返嚟嘅電波，確定到反射返嚟嘅嘢，佢個距離/高度同相對方位。隨住電子發展，發展到仲可以確定到電波撞到件嘢嘅速度同移動方向。由於固體同某程度上液體都反射到雷達波，加上電波多多少少都有噪訊，近呢三四十年啲雷達系統會有啲「隔」，減走啲唔要知嘅嘢，剩返啲使用者想見嘅反射，唔係一大喳反彈人都唔知邊個打邊個。

如果齋睇過 Top Gun 呢挺荷里活片嘅，啲戲入面嘅雷達一啲都唔真實，有幾樣嘢要澄清：

• 唔似地面啲雷達噉，絕大部份飛機上面嘅雷達，都係望住前面有限角度 -- F/A-18C 最大係左右夾埋 160 度，而 F-14B 只係有 140 度。事關個雷達因為空氣動力學等關係都放嚮機頭，雷達噉裝法又要轉足 360 度，電波嘅強度足夠煮熟個機師；俄國有款嘅 Su-27 曾經試過嚮機尾嘅圓栱度，裝多咗個後視雷達，但係實唔實際？之後再無機係噉嘅設計，加上各大國都主力開發「隱形」戰機，怕且唔多似係。
  
• 雷達唔係一次過同時間掃晒成個掃描範圍，個雷達波係由左至右掃，再由右至左掃返轉頭，咁樣叫一個 bar。可以想像到咁其實掃嘅範圍幾細吓，空優戰鬥機嘅雷達可以由機師設定到噉：由左至右一次之後，個電波移落少少，先至由右至左掃，到咗左邊移返上去原位度，整大啲個掃嘅範圍，咁做法叫兩個 bar。再加上去可以玩到去掃 4 個 bar，有啲似寫個『弓』字，F/A-18C 最多可以有 4 個 bar，F-14B 可以去到有成 6個 bar 咁多。係就可以「睇」清楚啲，不過越多 bar 來回要更多時間，郁得快嘅目標比較易跟甩咗。
  
• 靠彈返嚟嘅波嚟偵測嘅系統，好似雷達，聲納，射燈等等，都有個弊病 -- 就係偵測範圍以外嘅嘢，都好易發現偵測系統係開著咗 -- 打個比諭，嚮個好黑嘅山頂開住個電筒，係可以照到一定距離嘅嘢，不過照唔到嘅人，可以老遠見到個電筒嚮邊。戰機個翅都有條天線，去探測啲雷達波，直譯叫做雷達預警接收器（Radar Warning Receiver RWR)，甚至可以根據電波嘅特性，分到發出電波嘅係乜嘢嚟 -- 係 S-300 對空飛彈？係 F-15？之餘似類。
  
• 上面講到，雷達可以 check 到目標嘅速度，主要係靠「多普勒效應」，簡單啲嚟講，由相對接近緊嘅嘢彈返嚟嘅雷達波，個波長會細咗，相反個波長會長咗，留意係相對，都要睇埋目標郁嘅方向，噉先計得出個實際速度。由於就算係用「多普勒效應」，相對向相反方向「移動」嘅地面，佢啲反彈波都會混埋一齊出現埋，能夠「下視下射」嘅雷達系統會有個「隔」，專門減走啲相對時速加減 100 海里嘅訊號，呢個「空白」區域叫做 the notch，如果有戰機噉啱同咱身部機個航向成直角，個速度又係 100 海里嘅，噉就會「隱咗形」。

打吓打打搞到噉長，雷達當然唔止噉少嘢，遲吓再噏。