黑人女角係第一集的Gaal Dornick，因為對白上係Hari Seldon有問過佢知唔知咩係psychohistory。睇得出加咗動作，其實原小說係純劇情，照拍出嚟應該幾悶。

基地系列所講的理論，係話統計數學可以預測到個世界未來會點樣，然後可以做一啲事去將未來某程度改變，例如將帝國滅亡後復原的時間縮短。而成個故事其實係將人類進程的歷史分析再變化演繹，例如講到人類史點樣由工業變化到宗教主導，再由宗教變化到科技主導。

補充小小：個系列受史書《羅馬帝國興亡史》影響而創作。可以話係元祖嘅銀河帝國，星戰個城市星球 Coruscant 幾乎抄足。

Greyhound 可以話係 ATV＋ 第一套原創電影，Tom Hanks 大人有份監製同編劇。總括：中挺。

好：套片唔長，粒半鐘都無，故仔好集中，戰鬥場面之間無乜冷場，你鍾意軍事和／或歷史劇嘅應該幾啱睇。

唔係咁好：全部由艦長呢位主角嘅視點出發，難免出現「講多過做」嘅情況，加上太集中落主角度，其他人物路人化得滯；部份戰鬥場面，有啲唔合理，遲啲再講。

又唔會同經典嘅《追擊赤色十月》入面辛康納利去比，始終兩個角式動機同性格都唔同。Tom Hanks 算演得唔錯。

下面有啲關於戲入面嘅用語同背景，方便觀賞時候會易明啲，有透封咗，純粹拋書包，不喜勿入：

海上運輸：當年英帝號稱「日不落之國」，但係政治中心係個島國，無乜天然資源，唔好話打仗，連食同用嘅，都要靠外面輸入嚟。飛機載唔到咁多，一定要用船；就係因為兩次大戰都係咁，所以之後英國政府大力推展島上農業。

大西洋戰役：納粹德國深明海運係英國嘅生命線，佢水面戰力又唔夠傳統海軍大國英國佬嚟，所以主力發展又平啲又易生產又大量使用嘅潛艇，用嚟截擊英國啲補給。因為主要發生嚮大西洋，是為大西洋戰役。

潛艇：最原始嘅隱形武器，因為水底下肉眼見唔到。嗰陣時嘅科技嚟講，水下面行要用電池，速度慢過一般商船，續航力亦好有限，所以打嘅時候先會潛水，平時就水面行柴油，順手义埋電。武器以魚雷威力最大，炸穿船底唔沉都慢落嚟；以當時主力嘅七式潛艇咁計，彈數前後夾埋得14發，對受咗傷或者落單無還擊力嘅商船，多數用浮上水用支 88 mm 大炮搞掂，支炮仔對有裝甲嘅軍艦又無乜用。亦因為咁，多數會埋伏嚮目標前面，因為後面追，唔係追唔到就係畀護航嘅趕走。而家啲潛艇有啲仲大隻過啲快速艦，但再大都好，啲人都傳統咁叫佢哋做「艇」。

護衛：因為一戰領過嘢，所以由「新大陸」過去英國嘅船，都集中埋一齊，由驅逐艦護送，雖然驅逐艦細火力又唔夠，但勝在行得快，發現潛艇嘅時候可以好快咁趕去接敵。另一方面，同盟國生怕境內有軸心國間諜，所以船團嘅行踪視為高度機密。其實戲之前，41年英美已經開始用護航空母，通常由商船改裝，陪住船團作為空中搜索反潛戰力。另外，43 年開始，船團有專用嚟反潛嘅「獵人」戰船，之前驅逐艦甩咗潛艇會返返去船團唔理，但「獵人」唔會，對潛艇咬住唔放，係極可怕嘅敵人。

聲納：用水下嘅「喇叭」發聲，用水下咪（hydrophone) 聽啲反彈返嚟嘅聲波，探測水下面有咩物體嘅方位同距離，有啲似雷達個原理。原本用嚟水下導航，但用嚟搵潛水艇都好好用。唔止反潛嘅水面艦，潛艇上面都有。缺點係反彈嘅音波距離有限，對家嚮遠過有回音嘅距離都聽到「你把聲」，所以潛艇絕少會「開䡰」。離題：電腦網絡試地址有無反應個動作叫 ping，係出至聲納嘅使用。

Hydronphone effect : 水下收音咪，當潛艇好近支咪嘅時候，會聽到轉動中縲旋槳，產生出嚟啲真空泡「爆開」嘅聲。當時啲科技唔係咁先進，而家嘅唔只遠遠都聽到，甚至因為動力爐同縲旋槳嘅差異，連係隻艇嘅名都分到出嚟。

Huff Duff：當時德國潛艇同總部聯絡，會用高頻無線電，盟軍叫呢個做 Huff Duff，因為高頻，個無線電輻射無咁散，盟軍截到個通訊，可以大致知道潛艇嘅位置。

雷達：當年係幾新嘅科技，對採測飛機作用仲係幾有限，但對海面相當有效，可以目視距離外都探測到潛望鏡距離同方向。

狼群戰術：39 同 40 年呢啲「好日子」，德軍多數就咁一隻去進攻運輸船，但之後唔止有船團，盟軍嘅技術同經驗多咗，組織嚴密咗，單拖好難有斬獲；之後開始兩隻以上夾埋進攻，可以係一隻引開啲護衛，其他嘅靜靜埋去「開餐」。開頭都幾成功，但當盟軍技術戰術好咗，護衛數量多到可以有專職獵潛戰艦嘅時候，德軍已經輸咗場戰役。另外，日本好似英國咁，絕大部份資源都靠海路運返去本國度，美軍學德軍咁用潛艇截殺，連狼群戰術都抄埋。

餌誘：當年德軍嘅潛艇係用放出「鑵頭空氣」，誤導敵人用嚟甩身，盟軍稱之為 bold。

火災：除咗船底入水，船另一個大敵係火，火災失控唔止可能會燒爆隻船，亦可以燒到隻船無晒動力，同沉咗無乜分別。唔洗去咁遠睇中途島火災有幾大威脅，睇八十年代福克蘭，英軍有啲艦就係因為一粒炸彈而燒到廢咗。

位置圖：戲入面戰情中心係有張咁嘅枱，上面畫晒敵我位置同航向，當時無電腦亦無計數機，係靠咁去幫手做戰術決定；潛艇上都有張咁嘅枱，當然細好多，亦可以用嚟計出發射每支魚雷角度同時機。實情當年啲潛艇，可以同時齊射幾支魚雷（七式前方有4支魚雷管），扇形咁散開，等目標無得避，亦好以搏多發同時命中，對大型目標特別有效。

一套 graphic novel Snow Blind 居然引嚟六間片商爭奪，最後由 Apple 以高價投得，Jake Gyllenhaal （Brokeback Mountain, Spiderman: Far From Home) 有份演出，由 Gustav Möller 執導。另一套 Apple 咱家製作。
https://deadline.com/2020/07/jake-gy...on-1202982809/

無睇過套書，睇返啲雞精講有少年一個唔覺意發現佢啲屋企人，原來係受証人保護，引嚟仇家追殺嘅故事。

湯漢斯大人早前接受 Stephen Colbert 專訪，除咗講佢捐咗啲血清做抗肺炎研究之外，當然講佢套新戲 Greyhound，今次唔會好似上次衛報單嘢咁吐糟，講佢嚮 Kidd 級驅逐艦拍片嘅經歷（雖然套戲入面隻艦唔係呢個型號），亦講同佢公子同台演出嘅想法（演邊位有興趣可以搵搵）。

美國著名清淡節目主持人 Oprah 未開台之前，已經簽咗幾份合作計劃，而佢個 The Oprah Conversation 會訪問啲政治思想領䄂，仲有啲大師級人碼。第一話七月卅號上。

間諜片 Tehran 講一名伊朗出世嘅以色列特工，潛入德克蘭破壞伊朗核子武器嘅故事，一共8話，9月25號上。

受 John Campea 推介，開始追 Ted Lasso，逢星期五上一話，而家共有 8 話，全季（？）共有 10 話。可以講暫時都幾好嘅，追完再講。

按，繼《獵犬號》亂嚟之後，呢套譯《乜都得教練》，好心，除咗好老土之外，又唔係幾對題，好心 Apple 咁疊水，搵過個翻譯好冇？！

一個教開美大學美式足球，突然被請去做英超球隊教頭，咁都得？Ted Lasso 原形係 NBC 用嚟宣傳足球嘅（當然係英式），而家開個短篇畀佢。如果一心諗住有波睇嘅會好失望，除咗季尾之外，大部份都係口噏，主要賣英美文化差異，同滿瀉嘅人情味；故仔幾公式，基本上都估得都跟住點發展：睇主角點執返好隊，解決問題，呢味就留返畀啲講企管啲友講。 輕輕鬆鬆半粒鐘一話，引得人追落去，中上。

Ted Lasso 據報收得，第三季（無打錯）都批咗。

On the Rocks 係另一套 Apple 出資攝製電影，由 Sophia Coppola 編導，搵到 Bill Murray 再度演出佢都唔少嘢。成套片有啲 Lost in Translation 嘅味道，不過換咗女主角係佢個女，因為懷疑佢老公出軌，做老豆又懶緊張出手，加上佢自己到處滾就覺得全部男人都係咁；結果⋯⋯可惜笑料嘅係好薄嘅襯托，主題都係做女人嗰種無安全嘅心態。主要睇 Bill Murray 演出，真係救返成套戲；另一方面，Apple 拍得好鬼電視電影感，仲大陣過 Netflix，當另一邊拍電視直逼電影 -- 總結：中間。

For All Mankind 新一季 2月 19號上。

羅素兄弟執導， Tom Holland 主演嘅 Cherry，3月12 號上架。戰爭後遺症片，期待。

第 78 届金球獎，Ted Lasso 嘅 Jason Sudeikis 拎最佳電視刻劇（音樂／喜劇）男主角

Foundation 有新予告

最新予告：


好似好正，但冇人做反應，冇人拆解，可惜。

《基地》（或者應該叫《根基》）頭 2 話上咗架。跟住逢週五一話。

仲有今年艾美獎，Ted Lasso 幾乎掃晒啲喜劇類啲大獎。 S2 仲有2 話先完，完咗再講。

睇咗Foundation第一集，兩樣嘢改得幾好，Emperor加咗cloning，幾有趣，永遠真獨裁。加咗場恐襲，加強咗流放Seldon的理由，幾合理，而且有啲大場面冇咁悶。

Trantor喺我心目中唔係咁，書形容係地下城市，要搭lift去頂樓先見到太陽。不過算。成個故事係一直跳去唔同時間，等個Vault開，主角會不停咁轉人，唔知睇電視的人接唔接受到。

睇埋第二話，講 Trantor 會「深入」少少，但都未及星戰前傳帝都咁「大」～

有啲網評睇晒，話第五話開始「發力」，都係睇晒再評說。

Foundation第二集已經脫離原著，當新故事睇。

Ted Lasso 今年艾美奬掃好多大奬。第二季有成 12話，話話唔同長度。上季正面「勵志」，今季人物嘅關係深入咗，溫情正面仲有，笑料夠， 多咗少少打波場面，不過啲黑色嘢開始浮上面，尤其係主角同某角。劇力引人追煲，有一話集中只講某配角，過程轉折有趣，但同其他話似乎冇乜關係。總結：好。

另，Foundation 第二季已批開拍得。

Foundation S1E5，上一話個舖排有咗成果，幾緊張，不過個主角係咪同緊 Siri 講嘢？乜都唔得嘅？！

Foundation S1 全 10 話，每話大約 50 分鐘左右。故仔唔多講，本人無讀呢個系列，唔講有幾跟，但但睇啲解畫片講，改到離行離勒～

頭幾話個設定幾吸引，之後分出三四條故仔線 -- 最有趣係王室嗰條，演出亦都比較好。留咗好多謎，季尾收咗好多線，開咗新線，亦有啲問題未解。Apple 呢套好揼本，特技效果好正，但跳嚟跳去，地點同時間都係，唔係難跟，但搞到故仔爭咗個焦點，除咗三王之外，好難投入去啲角式度。創作人話預咗 7 至 8 季左右嘅劇情，好明顯唔會跟住書噉走法。

CODA 係 Child of Deaf Adult 嘅縮寫，亦係音樂上解個休止符。呢套係法國電影重拍，故仔講女主角係佢屋企入面唯一一個有聽覺嘅成員，又咁啱佢有歌唱天份，想向呢方面進修，面對學業、家庭、前途同周圍人際關係壓力嘅故事。夾住青春成長同埋家庭倫理，後尾有場兩父女嘅戲幾感人；最出奇呢套亦係歌唱片，呢歌幾好聽。另一個好嘅地方係，據啲評論講，同法國版唔同，呢度啲有聽障嘅角式，真係聾人嚟，所以演出自然又非常可信。唔係噉好嘅係，一家人都住埋十幾年，戲入面有啲磨擦好似今日先覺噉～