[肉羊哩咖]

一嚟係好評如潮，二嚟係有特價三個月，為咗呢套 Shōgun 「豪」畀佢。

據一本以真人真事改編嘅七十年代出版小說，第二度再改篇上小銀幕。第一次八十年代做過一次，今次又再拍一次。但係好唔同。

首先，攝影燈光衣飾同設計一流！但係講出嚟會好失望，成套劇都唔係日本「實景」拍攝，而係嚮加拿大哥倫比亞省 British Columbia ⋯⋯

故仔發生嚮 1600 年，男主角去到日本，轉折地遇上德川家康，正值德川正準備同其餘四位攝政嘅大老攤牌，德川發現呢位紅鬚綠眼可能有啲用～

舖呢個時候出咗四話，系列共十話。頭兩話根本係德川家康做主角 -- 套劇全部人物都改晒名，不過好多重要人物個真身都呼之欲出，所以呢度儘量用歷史上人名。

演員之中，真田 広之做德川家康絕對壓場，佢有份做埋監製，雖然製作群絕大部份係西人，但係啲設定考究極度認真，唔係本人講，好多日本人睇咗都讚。（第二）男主角呢位英國佬，絕對無一般去到異世界嘅主角咁，佢起初都好有立場，好有求生意志，有能力又有少少聰明，唔適應個文化衝擊，但慢慢佢個角色都嚮度轉變；負責同佢「溝通」兩位女角都好，可以話係女主角嘅 アンナ・サワイ 扮得幾似日本傳統女性，但係要剛強都唔輸蝕，反而角式好可憐，更靜更傳統好似更被動日本女性嘅保紫萌香，要「硬起嚟」絕對令人刮目相看。話就咁話，暫時唔係《碧眼待》呢啲「過晒界」嘅「左膠」作品，放心。

作為大配角嘅浅野 忠信，經常被夾嚮各位大老中間，又想撈啲油水嘅小人角式，有少少搞笑，但係要認真起嚟又令人關心佢個安危。噢，呢啲「男人戲」當然唔少得「睇肉」場口，呢度こうり ゆうか （打漢字呢度唔受，咳鬼咗下半）有大胆演出。

動作場口暫時唔多，有嘅唔止好突然，又好精彩，無一般日劇同荷里活嘅梗，仲要茄汁大平賣。

攝影又係唔似一般嘅日劇，色調比較暗，襯出個氣氛，但光嘅時候反差好大，電影感爆棚。

而故仔，第三話下半個英國人先開始担正，可以話係觀眾視點角式；另，唔好話唔熟嗰個時代嘅歷史，唔太熟日本古文化嘅，會睇得幾唔明，而編劇似乎無心長篇大論去解說，多數以側寫同零碎嘅對白解畫。 要留意嘅係，套劇係以日語為主，英語為輔，但係當年因為葡萄牙早就嚮日本霸咗地盤，人物講嘅多數係葡語，呢度係以英語當做葡語交談。

唔學啲人話呢套又係日版嘅 XXX，但極度推薦！第三話鬥智鬥力刺激，四話真係名乎其實嘅引爆，睇喇！！！