引用:
作者: 肉羊哩咖
The Diplomat S2 全六話。頭四話緊接返上季結局嘅事件，頭一話仲好緊張各角式嘅安危，但好快又用足四話時間帶返出去個故仔嘅兩條主線 -- 波斯灣事變同女主角嘅政治前途，雖然演出落力，但難免有拖嘅感覺，如果係 TWW 迷，會發現好多位向 TWW S2 致敬～ 而最後兩話，由 Allison Janney (The West Wing, American Beauty, Juno, The Creator, I Tonya 等等等等）飾演嘅美國副總統正式登場，由台型、談吐、壓場感到政治手碗，真實嗰位阿賀嬸唔好話替佢拎鞋都唔配，簡直難望其項背；唔單止令到兩條主線再起爆，個結尾比上一季玩得更「大」，女主角陷入前所未有嘅感情同政治危機之中。
縱觀無上一季咁正，一來個頭去得太慢，有啲哆嗦；二來人物寫得爭啲，新角除咗副總統之外無乜吸引力，而主角群都失色咗。
S3 已經開咗綠燈，不過未知會唔會係最後一季～
|
The Diplomat 隔咗一年到上 S3，共 8 話，每話 40 分鐘左右。
直接跟住上季完結做開頭，除咗睇主角點拆掂上季最尾爆鑊嘅責任，仲拎返故仔其中一條大線出嚟玩：白宮當權嘅想女主角做副總統；第一話已經玩出人意表，但睇返套劇個名，唔洗透都估到大致發展係點；中間穿插好多白宮官方嘅「繁文縟節」，同埋講多好多美國政治，本來呢啲嘢可以幾悶同離題，但到頭嚟去得夠快，加埋外交上嘅變數，玩得幾有趣。第四話就時間一跳，返返去第一季，個人感情同專業，國家利益同人際關係之間嘅矛盾同角力。居然仲可以拎返波斯灣事變壇嘢有手尾跟，再加多兩錢重嘅軍事危機，搞到最尾你以為大團㘣收場，點知實情係前所未有咁黑，劇情推到前所未有咁高。（後按：唔知點解連出兩次「前所末有」，費事改）
啲製作費今季加咗碼，唔同嘅古老大宅，豪華大屋景多咗好多，今次仲出動到三架直昇機咁誇張，連專用噴射機都終於出埋，班男女主角，出靚杉嘅場口都多咗，不過係唔係悅目，就各乜入各物喇～
演員方面，女主角兩公婆完全無失色，Allison Janney 戲份重咗，而繼續以演技台型搶晒鬼啲戲，女主角個感情瓜葛，編劇改咗某角個狀態，可能令到部份 shippers 失望，取而代之嘅某男角幾有型，同女主角都叫做幾襯～ 另一個「新」角式係演 Allison Janney 「傳說中」嘅老公，第一季已經提到，今季正式登場，由 Bradley Whitford 飾演，佢同 Allison Janney 由頭開始一齊做《白宮群英》，呢度佢個角式設計，出場唔多，但好對應返女主角個處境，講嘢又處處有機鋒，佢係幾挑通眼眉嘅人，同時又好暗示，女主角當初點解被睇中做副總統～
反而女主角兩個副手，今季戲份少咗好多，男嘅就真係行行企企，但因為波斯灣事變單嘢嘅發展，似乎留有伏筆，睇佢嚟緊會點玩；而女嘅 CIA 英國「分店長」，開頭講到好似好大鑊，但後尾又好似利用政治遊戲，最後又輕輕帶過無事，表現無上兩季咁強。亦因為今季主打美國政治方面，英國側就寫少咗好多，只有喜劇出身嘅 Rory Kinnear 個首相仍然夠出，畀夠發揮機會，但對住 Allison Janney，個人以為完全唔輸蝕。
本人最大嘅投訴，係隔咗一年度啫，唔知點解，除咗女主角個老公，個個嗰樣都老鬼咗咁多噉嘅～
