[多奇出品］- 曼聯的事與願違
今季聯賽剩低唔夠10場比賽，依家曼聯為爭前4不斷努力，無論係球員、領隊、球迷同管理層，但係依個成績係咪大家希望見到呢？
近10年嚟球會所投放嘅人力、物力同心力唔會比其他球會少，球會喺轉會窗俾嘅巨額轉會費，請返嚟嘅教練唔係名宿，就係擁有豐富執教經驗，青年軍就係最有潛質嘅一班人，而支持者亦係全球最多。喺擁有咁多有利條件下，就係攞唔到英超冠軍，究竟球隊仲欠缺啲咩呢？有咩問題係未解決呢？
要數問題或者欠缺嘅嘢其實可以數極都數唔晒，反而筆者認為各人對成敗得失嘅睇法同回應係比較關鍵。能夠喺比賽中獲勝當然係最好不過，除咗可以拎到3分之餘，士氣亦會有所提升，而當球隊賽和或被打敗，就難免會因失分令到大家失望。無論結果係勝利、和局定被打敗，每隊球隊同樣都會經歷，各球員對賽果嘅睇法亦都會有分別。有啲會覺得係個人問題，自己會作出檢討同埋會加操，有啲會覺得係隊友間合作問題，大家會一齊檢討，然後加強彼此嘅溝通，有啲會覺得兩樣都有。而足球始終係隊際運動，球員間嘅互動同磨合就顯得特別重要，當然促成大家團結嘅人除咗球員外，仲有領隊、管理層同埋球迷。
咁點樣能夠令大家可以更團結呢？其實，大家都心裡有數，就係溝通。相信球隊各成員不斷努力去搵出最有效嘅溝通方法，通常係搵一啲大家有共同方向、目標嘅人，其次係搵一啲可以被說服嘅人，然後就小數服從多數，最後係大家縱有唔同諗法，但一齊做出嚟嘅效果係一致，能夠達成同樣嘅目標嘅人。其實，邊種模式係最好就真係難以評論，所以喺足球世界根本就無絕對，我哋只可以講邊隊得勝嘅機率比較高同低，而弱隊勝強隊嘅情況亦都係經常出現。
