引用:
作者: Tano
上一代人處事方式
做細唔明好正常
當劇睇其實又幾過癮  |
搞下搞下...搞著班細0既......
----------------------------------
【王羽的order】幫謝賢曾江搞和頭酒
王馨平感頭痛：爹哋畀咗難題我
東華三院主席何超蕸﹑總理王賢誌﹑馬清揚夫婦及王喜等，今晚出席尖沙嘴洲際酒店舉行嘅「愛心滿東華慈善晚會」，而表演嘉賓則是王馨平（Linda）﹑李樂詩及李蕙敏。
Linda雖然今晚嚟表演，但心裡就囉囉攣，佢話因為九十幾歲嘅嫲嫲入院做手術，佢話：「藝人係咁喇，應承咗啲嘢要出席，今日晏晝要綵排，之後又要化妝，不過夜晚收到好消息，嫲嫲手術好成功，聽朝早會去探佢。」問到嫲嫲發生乜事呢？佢話：「膀胱結石，其實都擔心。」
同嫲嫲感情好好？Linda表示自己細個時，父母早離婚，而爹哋王羽又單身，當紅時要拍嘢，嫲嫲好照顧佢同好錫佢，記憶中嫲嫲同佢打韆鞦，又知佢愛飲茶，成日帶佢飲茶，佢又話爹哋好孝順，因為嫲嫲突然做手術，所以嚟咗香港。
同場Linda又爆爹哋好頑皮，不停問佢有關曾江及謝賢uncle掌摑事件：「佢（爹哋）仲喺度笑囉，佢問我，我話唔知呀，佢話要佢出面請佢哋食飯，搞和頭酒，又命令我打電話，我0依家好頭痛，我打畀舅父（曾江）冇問題，唔知點搞謝賢uncle，佢哋咁多年好朋友，唔想佢哋搞成咁，老人家呢嘅嘢，其實後輩唔應該理，但爸爸吩咐我。」
問到幾時搞？Linda話忙埋呢兩日就會搞。至於點入手呢？佢話：「爹哋應該有謝賢uncle電話，佢畀咗個難題我，細個叫我唔好理長輩嘢，但今次要我去搞。」咁Linda會否出席？佢就話：「都要出席啦，因為今次爹哋想，佢仲命令我咁做，自己有啲緊張，我爹哋真係好頑皮囉。」
