引用:
作者: 野良猫
唔係預咗蝕嘅咩
港產片根本唔應該用咁多錢拍
|
只可以講係極高風險, 而且疫情會有影響, 又可能後期拖得耐拉高左成本。
不過都係果句, 電影唔係只係一盤生意, 某程度上係藝術, 亦有好多電影人係有夢想的。
參考下:
Terry的媒體懶人堂
https://www.facebook.com/terrylazyclass/
支持古天樂，又何止「打感動」咁片面？
稍後講少少親身經歷。
古生唔係普通演員，係香港電影產業嘅支柱。睇一套戲等佢蝕少啲，意味住佢會留到多啲資源去幫助電影業。
如果純講感情，當然冇人需要為佢嘅夢想負責，但係佢亦都為咗好多電影從業員嘅生計、理想孭飛。
有來有往，有好多電影大家有得睇，背後都有古天樂。
套戲或者唔算精彩，但古生本身已經足以叫人入場。《明日戰記》投資額係4.5億，電影一般要收三至四倍票房先有得回本或賺到微利，係好難做的。
所以，而家中國票房係無可能打平手的。
可能你會話，咁點解要支持古天樂？
2018年做過天下一集團，古生成日都出入Office，間唔時我哋會收到Order，希望可以幫手捧一啲藝人，等佢哋多啲行業經驗。
而佢想幫嘅，全部都係極極極少人識嘅藝人。
而我當時公司都處理過幾次，係古生親自安排的。有一個Artist，直情係古生出錢請做全職，因為演出收入太少，古生唔想佢放棄做演員。
嗰位演員，直情唔係古生旗下的。
連動作演員，古生都親自安排出鏡機會，因為知打得辛苦又難生活。
而頭先講嘅演員，而家已經冒起，甚至紅咗。你話佢有無眼光，我覺得有。
有一間幕後公司當時有困難，古生出手相救，經營成本好高，但佢最後決定盡量保持原狀，因為唔想影響工業發展。
全部係我親眼見證，報紙無報過，因為古生真係好低調。佢對行業絕對係有承擔，好多演藝界人士出嚟讚佢，我寫包單全部都係自發，係忍唔住讚。
一個連Office都想整靚啲畀同事，對台前幕後畀足機會嘅人，幫咁多人追夢，自己想玩一次，點解唔支持？
當然，大家都希望支持電影夢之餘，嗰套都係一套好電影。咁唔講故事，特效邊際上係好難進步的，因為好好好貴。
唔係淨係打感動，如果你做過動畫或者後製項目，就知道成本極高，而家連台灣都算好貴，判到去東南亞，甚至更加遠了。
想香港人做特技，完全係玩命燒錢。唔係佢一個人想興奮玩吓，呢幾億投資，其實都養起好多人。
香港願意做科技大片，呢個嘗試本身都值得支持，更唔使講係古天樂主理。
感動有，實際都有，8月25日，希望大家多多支持《明日戰記》。
