好地方 The Good Place
人點都會死，死咗之後又會點？世界各大宗教哲學都自有一套解釋；大部份大致都話：做好事就上天堂（或類同），做壞事，和或破壞教規就落地獄（或類同）受（永恒）苦。好地方呢套劇就玩呢個觀念—好人死咗後就去「好地方」，壞人死後就去「壞地方」咁話。
S1 講女主角 Eleanor 係個道德水平好低，唔理人感受嘅人，有一日佢死咗（仲要死得好難睇），點知被管理人米高話佢好咗「好地方」，係個為好人往生嘅地方，嗰度每人都配有個 soulmate，遇到嘅人同事都係稱心如意；女主角自知唔應該留嚮度，又自私咁唔想自爆攞嚟衰嘅情況下，夾硬死頂，咁啱佢個「騷眉」係個哲學教授 Chidi，對外就扮好人，內裡就要 Chidi 幫佢補習，加埋佢個鄰居— 無口憎人同名門淑女呢個組合，學點做返個好人。
玩呢味嘢，又完全唔涉獵任何宗教，大講哲學唔離題之餘又唔悶，笑料主要落去啲錯摸拉度，再加上女主角啲壞習慣有時失控同埋啲自卑情結。另一個特式就係幾乎每話尾都幾乎會出然突發情況，一扭之下留待下回分解.......
S1 最大個扭橋—慎入！
女主角經歷咗咁多之後，其實佢「騷眉」同兩位鄰居，都唔係完人，突然覺悟到佢根本唔係嚮「好地方」，而係個特製嘅「壞地方」，係利用居民之間關係性格，再加上米高暗中玩嘢，去互相折磨。
S2 緊接大橋穿咗之後，上半啲笑料米高為咗補鑊，一面瞞住上層，一面要應付手下叛變，又要同主角四人組鬥法，最精彩嘅係，去到中間索性將成個處境掉咗再轉換，去返落去主角四人組個性格同生前事嗰度。去到最尾，再一次掉咗原有嘅處境，嚟一個真正 reboot。製作群好敢試新嘢，唔會玩到爛先識收，係就幾幾跳躍吓，但勝在無話太過超展開，主角啲性格又見到不斷改善緊。
S3 開始幾慢，有啲夾硬，但過咗3 話之後好返，又玩好多天馬行空嘅地方，豐富個世界觀。
個人覺得主角四人組除咗 Janson 有啲難頂之外，其餘3 個都寫得幾好，最搶鏡嘅係 Janet — 人型 Siri/Alexa/Contana/Mercedes，不單只隨傳隨到，有無限知識，仲有求必應，你要乜佢即刻變畀你。妙在佢仲有自我求生「本能」，去到 S3，佢唔單止係米高個精神支柱，好多問題都靠佢搞掂。
