2021/22 英格蘭足總盃第四圈 - 曼聯 VS 米杜士堡
全場完，曼聯1:1米杜士堡 (7:8)
上半場1分鐘辛祖嘗試笠入中楣彈出，般奴補射高出，5分鐘梳爾落底線傳中，C朗門前接應倒掛可惜被門將接實。11分鐘又係C朗接應達洛治短傳輕輕一笠又被門將跳高接實，18分鐘普巴禁區內被對手拉跌，獲得十二碼機會之下，C朗主射射左邊斜出...好彩24分鐘普巴係中場攔下對方傳球，般奴大腳傳前俾辛祖再推落底線射地波入網成1比0。26分鐘C朗門前試圖接應福仔二傳但被門將出迎沒收，28分鐘再係C朗左路斜射地波斜出，29分鐘C朗及般奴撞傳俾前面嘅福仔勁射入網，不過福仔越位在先入球無效，32分鐘都係C朗接應般奴斜傳左路半單刀射門被門將擋出。上半場曼聯威脅性攻勢不斷，但把握力不足無辦法擴大比數。
下半場初段53分鐘梳爾左邊傳前俾辛祖，見到右邊嘅福仔有空位即刻橫傳，福仔接應撞射被門將救出，54分鐘福仔趁住反擊機會帶波落右路底線再傳俾C朗勁射中網邊出界。56分鐘對手亦有一次攻勢，先於右路傳中俾隊友撞射被軒達臣單手撲出。不過63分鐘出現爭議性判決，對手先係右路傳中，有人禁區內接應再橫傳俾隊友射入追平，但爭議在於禁區內接應時犯手球，但球證指係意外手球(accidental)...尾段時間及加時階段兩隊再無取得任何入球，兩隊需要互射十二碼分出勝負，最終艾寧加射失十二碼，以7比8輸波出局。
