A-4E Skyhawk 天鷹，屬輕攻擊機，五十年代中首飛，主要活躍於越戰初期、贖罪日戰爭同福克蘭戰爭。主要攜帶「蠢彈」，亦可以用早期反雷達飛彈同響尾蛇飛彈，亦可以用到核武。當年為美國海軍同海軍陸戰隊使用，退役後（被 A-6 同 A-7 取代）成為訓練用機，有睇 Top Gun 知佢係配角機之一，等學員可以有對抗細而靈活戰機嘅經驗。到今日，仍然服役於阿根廷同巴西軍隊。
機體嘅設計受當時代三角翼潮流影響，E 型已經加強咗引擎出力，但無後燃器，比較適合中低空使用，機上只有基本嘅對地雷達，五個掛點可以帶相當大量武器，最大嘅特色係佢左右滾動速率非常高，一個唔小心，真係有過機師轉到失神。
呢個 mod 係一班有心人整出嚟，所以正名係 A-4E-C （community) 版，玩呢部機無需要先要其他機體，外觀整得好仔細，狹窄嘅駕駛艙亦完全展示出嚟，大部份嘅掣都用得，連無線電同導航 TACAN 都用得。武裝方面，無引導炸彈、火箭、集束彈、額外機炮、白勞鳥反雷達飛彈，同響尾蛇彈都得，而越戰「名物」燒夷彈 (naplam)，雖然可以裝備，但係 DCS 本身無模擬呢種燃燒式武器效果，實際只係有集束彈嘅效果。可惜嘅係無得裝鬥犬同牆眼飛彈，因為製作群組因為唔係真係第三廠，無得用到原廠 SDK 而無法使用，同樣原因，亦無得玩空中加油，同超級空母嘅整合都好有限。
差啲唔記得，呢部機係完全免費。亦由於極受歡迎，亦曾被各國大量使用，所以有極多外皮可以轉。
如果你想唔科錢玩 DCS，又唔係太好對空戰鬥，對地攻擊有興趣嘅話，呢部最極好嘅入門機！
下載：
https://github.com/heclak/community-...ses/tag/v2.0.1
討論：
https://forum.dcs.world/topic/207102-community-a-4e-c/
