2021/22 歐聯16強次回合 - 曼聯 VS 馬體會
全場完，曼聯0:1馬體會
上半場2分鐘達洛治吊入禁區俾艾寧加攻門被門將出迎救出，12分鐘輪到曼聯黃金機會，達洛治先從後場帶波越過兩名對方球員後，C朗接應並與般奴撞傳，其後般奴落右路底線傳中俾艾寧加門前撞射，可惜射中門將頭部彈出。15分鐘馬體會都有靚遠射被迪基亞飛身單手撲出，18分鐘達洛治右邊K角位遠射被對手用腳擋下。19分鐘費特入攝至左路底線試圖越過對手再傳中但被封阻，不過到20分鐘般奴入禁區跳起接應達洛治傳球時被對手撞跌，但球證並無吹罰。上半場中段25分鐘又係達洛治試圖K角位遠射被門將接實，曼聯進攻乏力之下，32分鐘反而俾對手入波，對手右路傳中俾祖奧菲歷斯撞射入網，幸好越位在先判入球無效。36分鐘球證又一次走甩對手犯規，艾寧加右路推進時被推跌...40分鐘馬體會先開記錄，麥佳亞標前至中場位置試圖攔截，但被對手撞傳之下殺入禁區，其後右路傳中俾遠柱頭鎚頂入成0比1，達洛治趕唔切封阻...補時階段般奴先遠射被救出後，麥佳亞接應角球二傳俾門前嘅華拉尼攻門又被門將沒收，半場完。
下半場馬體會以一球優勢收縮防守區域，試圖泊大巴死守到尾，曼聯方面則有多次進攻機會但無奈欠缺板斧。58分鐘辛祖接應達洛治右路傳中抽射高出，65分鐘般奴左路開出罰球後，C朗門前跳起但頂唔到斜出。其後蘭歷克換入馬迪、福仔及普巴，打算以上場對熱刺嘅中場組合打破久攻不下嘅局面，76分鐘曼聯可謂又一次黃金機會，華拉尼禁區接應泰利斯罰球，頭鎚頂中先被門將救到，C朗再倒掛補射又被沒收，82分鐘達洛治再一次K角位遠射斜出。最後10分鐘曼聯依然攻唔入馬體會嘅大門，並被對手戰術性拖延時間至完場，最終曼聯係歐聯十六強止步，其實尾段時間曼聯再換入馬達及卡雲尼以四前鋒陣式進攻，不過對手亦以六後衛鐵桶陣式死守還以顏色...
