[肉羊哩咖]

皇家連同貴族理論上嚮經濟政治同武力上掌握咗全人類嘅權力，但實際經濟上，冚棚欄全部由宇航公會把持實際運輸嘅工作。公會入面嘅領航員，因為長期「服用」香料嘅關係，有住預測航道上危險嘅能力，「駕駛」超巨大太空船做「迅間轉移」，呢啲領航員身體亦因為噉變到「不似人形」，長相係極高機密，連皇帝噉大都唔能夠知道係點。

另一個秘密組織係 Bene Gesserit，表面上係一個全女班嘅宗教團體，個個身憻絕技，話就話志在替人類服務，但暗中操縱人類發展，利用極長時期嘅配種計劃，個終極目標係培養出件「超人」出嚟。利害嘅地方係佢用軟功，慢慢安插自己人入去各權貴階層 -- 上至皇室貴族，下至宮廷人仕同官員，唔係係會員嘅話，好多時係呢啲人仕嘅另一半～ 另一方面係有目標地「傳教」，嚮平民文化上做影響。其中一個操作，令到現任皇家「無仔生」，清一色都係女，而啲王女都係以入學嘅名義被「踢入會」，入咗會就噉就成世無得「退會」～ 因為佢哋啲勢力龐大又能力極怪異，一般人難以理解同唔信任，背後被唱為「巫婆」。

講到科技發展，當自動化機器無得做，有人轉去發展生物科技，掌握呢方面嘅係 Tleilaxu，佢哋識用複製技術去「復活」啲死人，亦識整啲完美扮任何人嘅 face dancers。因為獨門技術同封閉社會，亦係帝國入面一大勢力。