年頭就北海道,年尾就濟州,好邪!
唔熟民航機唔熟,尤其呢次可能涉及人為因素,唔敢亂講,去到今日為止,官方透出嚟資料,係有好多疑問:
天:由好多片顯示到出事時,個天無雲靚到震,亦無話有咩側風嘅問題。出事嘅班次係半夜機,對機師嘅精神狀態有冇影響,暫時無辦法知道。
機械,出事呢架波音 737-800, 唔係惡名遠播嘅 737 MAX,連副引擎都唔一樣,雖然波記近年啲品管真係「有口皆碑」,管理層為咗「為股東謀取最大利益」,係咁咳,唔應該慳嘅都慳返,絕對唔係某啲「侵粉」話係公司搞埋啲咩「左膠」嘢而害死人;呢架之前啲記錄都唔算太曳,好多廉航都用緊佢。
地:個機場本身有個方向都係候鳥悽息地,啲飛機畀雀仔撞都唔係新聞,有報導指,出事客機機師發出求救通話先兩分鐘,機場控制塔已經發出咗鳥擊預警。另一方面個跑道尾,作為引導降落嘅天線陣,居然用強化水泥架起,架機就係撞到正,發生大爆炸;如果只係一般用鐵架,撞到就無咁傷。
人:暫時唔覺有報導提到兩位正副機長嘅詳細資料,佢哋由懷疑受鳥擊開始到撞毀之間,講過啲乜做過啲咩,飛機上個「黑盒」,入面應該多多少會知多啲。
疑點:
1. 由發出救難訊號到撞毀,前後都無六分鐘,期間架機由向北轉咗個圈變咗向南,點解咁急要降落?
2. 一般嘅情況,鳥擊無咁易破壞成個引擎,最多令到個引擎因為吸唔到空氣而產生空氣失速現象 -- 個引擎因為吸唔夠氣而無咗推力。
3. 因為係進入咗降落程序,得返單一粒引擎,大都仲可以安全降落,但係啲片都不約同都見到左邊無被撞嘅引擎未爆之前都仲運行得好正常。
4. 如果因為鳥撞而損毀咗個引擎,有冇令到駕駛艙充滿濃煙?有就機師好難去駕駛部機。
5. 點解嚮跑道滑行嘅時候,速度會咁高?今日資料講,機體接觸地面嗰下,已經過咗跑道開頭 1200 米,而成個跑道只長 2800 米,正路係用盡成條跑道嘅長度,而家咁嘅距離絕對唔夠長整停部機。係咪有判斷錯誤?事關飛機離地兩三米左右,會出現地面效應,玩開直昇機嘅老細都知,呢個高度,空氣會形成一個咕口臣層,托起部機,係咪無考慮到呢個因素而令到架機延遲滑行?
6. 講到滑行,好多老細都會問點解無起落架。有人話個鳥擊整爛咗個起落架,呢樣無乜可能,如果係因為咁而破壞咗個液壓系統,係有可能,但係一就有後備,二則同軍機一樣,有個緊急起落架跌下裝置,每個架都有條幾長嘅纜,拉佢可以令到起落架直接跌出嚟。
7. 起落架有三個用處,一則地面滑行嗰陣可以轉方向,二則係未著地之前可以幫助減速,事關啲架個空氣阻力都幾大,另一個係地面上可以煞車。有可能右邊個架啲轆爆晒軚,好似加拿大單嘢咁,落咗都無用。
8,講到減速,飛機對翼後面有副襟翼,可以增加升力,同時間亦會增加阻力減慢部機,搭飛機起飛降落時都會見到,另外係主翼前沿嘅 spoiler,比襟翼細但係功能相同,最後有空氣煞車板,豎起嚟會加大風阻而達到減速嘅效果。但呢三樣嘢,嚮滑行條片度一個都無,如果係講受損用唔到,之前有另一條片,拍到懷疑受鳥擊嘅片斷,當時係見到襟翼已經放咗落嚟,幾時同點解要收返起;係咪滑行嗰下其實唔係失敗嘅降落,反而係失敗咗嘅緊急扒昇?
9. 最後,每當有突發事件發生,每架飛機都因應事件,有個一步步講解嘅 checklist,去減低出事率,機師要跟住呢個清單去照做,根據揸過 737-800 嘅前機師,如果係鳥擊而導致一個引擎失效,要跟足成個清單,冇十五到廿分鐘無可能做完。究竟出事嘅機師有無跟個清單照執,而無做又點解。
__________________
- 有錯麻煩指正
- 排緊隊:寄生獸 Grey、Fallout、The Bad Batch、X-Men 97 、戰隊大失格、怪獸 8 號⋯⋯
- 「我絕不要恐懼。恐懼是會扼殺思維能力的潛伏死神,會徹底毀滅一個人。我要忍,讓它掠過我的身心。之後我睜開心靈眼睛,審視它的軌跡。恐懼如風,風過無痕,惟我依然屹立。」—— Dune
此篇文章於 01-01-25 12:51 AM 被 肉羊哩咖 編輯。
|