又來......
球壇包公：「烏鴉口」又貼世盃
24.03.2010 06:48
【商台互動體育組】球壇包公：人善人欺天不欺，世間還有包青天，我球壇包公會負起替天行道的責任，為球壇的重要大事以至雞毛小事主持公道，不偏不倚，上至國際足協，下至球場草皮都難逃法眼，球迷放心：
球王比利：巴、阿、西、英
巴西球王比利一向有「烏鴉口」之稱，事關佢每屆世盃貼邊隊冠軍，都例牌贏唔到，搞到好多球迷都怕咗佢，驚佢貼死自己愛隊吖嘛！日前，比利又開「金口」，預測今屆南非世盃中，巴西、阿根廷、西班牙、英格蘭將會佔4強席位。
現年69歲嘅比利，率先講到祖國巴西：「有鄧加領軍我好放心，而家呢隊巴西上晒軌道，只係驚好多隊員都未踢過世盃，會好大壓力。」至於邊隊係巴西嘅最強對手，比利就話係西班牙。講到宿敵阿根廷，比利就話：「外圍賽佢哋雖然踢得辛苦，但係歷史有晒見證，就係阿根廷每每喺決賽周踢得好出色！」
最後4強一席，比利「眷顧」英格蘭，英軍球迷真係要多謝你呀！「英格蘭係南非世盃最難被擊敗嘅球隊之一。」唉，講真吖，4支全部都係熱門隊，使乜勞煩球王比利你貼4強呢？驚就驚在「烏鴉口」一出，陣間4隊都……
正宗「球迷」：費查
記得我包公細個嗰陣，好鍾意買齊晒啲足球雜誌，定儲球星集圖冊，我都屬於一個超級球迷。但講到「虔誠」嘅，一定係曼聯中場費查。呢位蘇格蘭國腳雖然效力緊歐洲頂級球會紅魔，但佢自問行為仍然似足一個球迷無異。原來，費查仲會長期買足球雜誌，同埋成日喺屋企睇直播賽事：「我由細到大都係咁，我希望永遠都可以係咁；我雖然已經係職業足球員，但係仍然會成日踢波，最好見到爭標對手失分啦！我仲會喺屋企打氣！」
奧尼爾謙虛識幫隊員減壓
英超今季爭前4寧舍精彩，數數下有4隊有機會攞到呢個歐聯席位。阿士東維拉目前以29場得50分排第7，雖然落後緊第4嘅熱刺5分，但有少賽1場優勢。不過，領隊奧尼爾就話打定輸數，話維拉唔夠曼城爭入前4喎。奧尼爾咁講：「曼城唔使為其他賽事分心，後備力量又勁，點計都好過我哋啦！」有時英超領隊好鍾意耍手段，抬高對手，等自己班球員減壓，咁樣喺聯賽尾段反而表現更好！哼，熱刺、利物浦同曼城，小心維拉後上攞走第4呀！
