復活假前，製作公司 Legendary 公怖咗會有第三部，導演已經寫緊腳本。
iTunes 版已出，繼續無 deleted scene，亦無新加片段，4K 呢啲標準嘢之外，啲音效係正咗好多～
如果一次過睇晒兩 part，會留意到好多兩套都有呼應嘅嘢：好似個背脊、腳步聲、「光線好低嘅時候」，同埋，最後嗰場比武～
之前講過，呢一部同原著比，改咗好多嘢，有啲好影響第三部點玩法：
差異⋯⋯
最大嘅係 Chani，佢書入面無咁「現代」同「獨立」，對宗教嘅嘢佢無乜點講 -- 老實講，一個咁緊密嘅社區，好容易政教合一，又無乜受教育嘅機會，好難發展出咁嘅性格；書入面嘅 Chani 亦好「傳統」，基本上對 Paul 死心塌地，就算要娶公主嗰度，「家婆」主動解咗畫，公主只係政治婚姻，做個樣，床上面「坐正」嘅始終會係佢，唔會有嗰咁嘅結局。而書入面有度一跳跳咗 6 年，佢兩條友連仔都生埋，但係畀皇帝啲沙滴卡殺死咗，刺激到阿 Paul 走去飲生命之水～
另外，Chani 個老死係電影原創角式，又相當 work，電影入面無提佢個名，個字幕話佢叫 Shishakli （唔識點發音）
另一個大改嘅係「家婆」Jessica，佢書入面無咁主動，亦無四處散播 Paul 嘅神話傳說，係班「飯民」一 廂情願當佢神咁拜；亦無同肚入面個女「傾偈」，無裝阿仔去「飲嘢」，電影就係邪係奸一線之隔。
因為時間有跳到嘅關係，書入面 Alia 最尾已經出咗世，仲嚮沙滴卡襲擊嘅時候畀皇帝捉咗，最後係 Alia 殺咗佢外公阿男爵～
而個結局，書入面除咗 Chani 無發皮四玩分手之外，亦無話班「飯民」即刻走去打聖戰，反而由宇航公會出聲擺平單嘢，由 Paul 統治成個宇宙，聖戰係之後，兩本書之間嘅事，Paul 完全無能力管到班友。老老實實，好似戲入面咁有人敢反對，阿 Paul 一個唔老嚟真係玩攬炒，炸 Q 晒啲香料，人類死得咁滯，呢隻鑊無人担得起，仲反枱？！有啲唔多合理。
唔知係導演玩暗示，定係佢完全無為意，阿 Paul 幾時係用到佢啲預告能力，幾時唔係，好多時都無乜點交待到，尤其呢一部入面，有幾多講嘅嘢係真心，唔知頭唔知路，定係一早預見到會點，就住嚟玩令自己有利，木宰羊。
