2022/23 歐霸盃8強次回合 - 西維爾 VS 曼聯
全場完,西維爾3:0曼聯
歐霸盃首回合主場開段大好形勢,最後被西維爾於尾段時間10分鐘內連追兩球逼和2比2,兩球失球純屬自己犯錯...次回合去到西維爾主場,肯定今仗唔容易應付,一來雖然對手於西甲聯賽成績一般,但歐霸盃比賽經驗豐富,加上近年每次對陣西維爾均被擊敗 ; 二來曼聯自己後防線未算穩健,面對住坐擁主場之利嘅西維爾,心理壓力定必更為沉重,但無論如何都要咬實牙關迎難而上。正選陣容方面,沿用上場左達右雲嘅兩個閘位,中場般奴需停賽,唯有用艾歷臣配搭薩碧沙做串連派牌,其他位置則無太大改動。
上半場開段7分鐘,曼聯即刻先失一球,原因竟然係後防線自己犯下嚴重失誤,迪基亞被對手前鋒上前逼搶時交俾旁邊有兩名西維爾球員看管嘅麥佳亞,麥佳亞見狀打算立即橫傳俾雲拜沙卡,但被截下形成三打二局面,對手向前一推推過麥佳亞射地波入網成0比1...之後雙方互有攻勢,22分鐘辛祖左路帶波試圖突破,橫傳俾禁區頂嘅安東尼撞射射中薩碧沙彈出,雲拜沙卡補射無力被門將接實,25分鐘西維爾中路一記直傳,有人接應推入禁區,連連洛夫第一時間踢出界外解圍,後有左路後腳傳中俾遠柱壓過連迪洛夫頭鎚攻門,迪基亞上前伸手抄走,34分鐘安東尼傳俾卡斯米路插入禁區頂中可惜高出,37分鐘輪到對手禁區頂射地波無力被迪基亞接實。上半場尾段時間39分鐘西維爾食詐糊,卡斯米路橫傳俾雲拜沙卡時傳失,對手順勢從左路傳中至遠柱一控再射入網,不過經VAR指越位在先判入球無效,叫做拯救曼聯一次,但形勢隨即落入西維爾腳下,幸好守住餘下時間返入更衣室,半場曼聯先輸一球。
下半場坦帥換入拉舒福特及梳爾,換走雲拜沙卡及辛祖,但隨即於46分鐘大門又再失守,對手開出角球至小禁區,有人跳高頂到中楣笠入收死迪基亞成0比2...開段繼續係西維爾攻勢,50分鐘左路燙射被迪基亞撲出界外,51分鐘角球攻勢下對手又再頂中,一輪門前混戰由達洛治成功封阻,再由梳爾大腳踢走解圍,雖然短短幾分鐘內力保不失,但中後防線不斷響起警號,同時間對手信心大增,相反曼聯一眾球員嘅精神面貌都顯得十分頹喪,雙方形成極大對比。比賽去到中尾段時間,曼聯機會唔多,最有威脅可謂艾歷臣71分鐘嘅罰球斜出,西維爾則攻勢不斷,包括74分鐘右路cup過後備入替嘅費特再斜傳中間,但無人接應於門前越過等等,而80分鐘對手把握到迪基亞出迎失誤變為助攻,順勢大腳射入空門成0比3,最終曼聯作客慘吞三蛋,於歐霸盃八強出局,兩回合計其中四球失球都係原於自己犯錯,只能夠講無論鬥心、士氣及各方面因素,曼聯都輸俾西維爾,未有發揮出應有水準,難怪坦帥都懷疑人生...
|