|
2022/23 英格蘭超級足球聯賽第二十三場 - 列斯聯 VS 曼聯
全場完，列斯聯0:2曼聯
再次對上列斯聯，今仗作客勢要奪取三分，把握英超榜上其他球隊失分嘅機會。正選陣容方面，坦帥派麥佳亞搭擋梳爾上陣，而兩閘則用馬拉西亞及達洛治，整條後防線有啲令人擔心，始華拉尼及馬天尼斯表現較為穩陣，而中前場就無太大改變。
上半場開段3分鐘列斯聯就有一次黃金機會，對手先從左路底線接應罰球再橫傳中路，迪基亞救到但有人小禁區邊補射，馬拉西亞從旁封阻下炒高出界。之後時間曼聯中前場組織似乎出現斷層，列斯聯乘著主場優勢加上中前場壓逼，令曼聯中後場無辦法順利用波，只能夠盡快交俾前場球員發動攻勢。18分鐘辛祖右路接應般奴大腳傳前後，推向邊線再橫傳俾入攝禁區嘅般奴起腳射斜出界，亦係曼聯上半場第一個較為有威脅嘅攻門。其後34分鐘一度出現驚險場面，梳爾回傳俾麥佳亞後，麥佳亞動作太慢，用腳一控試圖交俾迪基亞時，身後有人逼甩球權再推入禁區等隊友接應，幸好麥佳亞自己及時出腳解圍守得返...39分鐘薩碧沙用頭攔下球權，頂俾福仔短傳俾般奴，禁區外順勢遠射可惜無力被門將接實。完半場前43分鐘對手又有一次黃金機會，先從後場大腳傳前俾右路，馬拉西亞頂到但未能夠解圍，對手控定再迅速推入小禁區射門，迪基亞救到但個波撲至回防嘅麥佳亞腹部，幸好無反彈入網...不過曼聯係補時45分鐘同樣有一次黃金機會，般奴前場攔下球權再自己帶波推入禁區成單刀斜射，可惜射唔過門將十指關，之後嘅角球攻勢，福仔門前亦來遲一步執唔到雞，雙方上半場互交白卷，不過列斯聯攻勢比曼聯更具威脅，而且曼聯後防線不穩，無失球的確有運...
下半場列斯聯繼續進攻，46分鐘禁區頂接應傳球，轉身一推再遠射被迪基亞撲出界外，角球攻勢對手門前頭鎚又頂到但高出，47分鐘對手右路左腳撞射斜出，甚至48分鐘迪基亞大腳誤傳俾對手，費特及時回防攔下解圍。對手攻勢一浪接一浪，相反曼聯中後場依靠麥佳亞做組織第一點，攻勢相當緩慢，加上對手只壓逼除麥佳亞外嘅其他曼聯球員，令曼聯第二點唔能夠暢順運轉之餘，後防線無辦法傳前俾兩翼，中間嘅薩碧沙及般奴又有列斯聯球員壓逼阻隔，形成斷層。隨後到62分鐘曼聯先陸續開始有射門，達洛治禁區頂一控勁射中楣彈出，64分鐘費特接應般奴短傳遠射斜出。而列斯聯都係咬住曼聯唔放，65分鐘左路內切入中間燙射，以及69分鐘門前倒掛均被迪基亞接實，77分鐘梳爾回傳失誤，對手立即帶波推入禁區起腳，迪基亞用腳擋下。形勢到尾段時間先有好轉，坦帥換入馬天尼斯及雲拜沙卡後，後防線變穩之餘，組織攻勢上馬天尼斯比麥佳亞優勝得多，而比賽亦到79分鐘先打破僵局，薩碧沙大腳轉邊俾梳爾再左腳傳中，門前有福仔靚頭鎚頂入成1比0，都係要靠福仔行先一步。84分鐘曼聯憑住下半場踢攻中位置嘅韋賀斯，直傳俾後備入替嘅加拿祖推入禁區射近柱，對方門將救到依然中柱彈入，再下一城至2比0，最終曼聯成功作客奪取寶貴嘅三分完場，其實今仗列斯聯踢得比曼聯較好，曼聯後防線幾次自爆，令唔少曼迷膽戰心驚，不過臨尾靠福仔及加拿祖入兩球鎖定勝局，賽後坦帥都笑容滿面，似乎十分滿意兩位嘅表現。
|
