2021/22 英格蘭超級足球聯賽第三周 - 狼隊 VS 曼聯
全場完，狼隊0:1曼聯
上半場開波2分鐘費特斜傳時交失，被對手直接發動反擊，帶波推至禁區邊位置斜傳俾隊友之下射門，迪基亞用腳擋出。5分鐘曼聯一次角球攻勢下，對方球員解圍後又再一次快速反擊，但處於中場位置嘅費特攔截時未控好波，彈俾旁邊嘅狼隊球員並帶波推入禁區，費特試圖回防但顯得十分狼狽並且跌低，幸好有雲比沙卡護空門...其後狼隊繼續進攻，連番射門但未能射破迪基亞十指關，不過值得一提嘅係開段嘅曼聯防線真係性感到嚇死人...25分鐘狼隊左路橫傳俾門前嘅隊友試圖倒掛但射斜出界。半場前37分鐘般奴接應普巴長傳成單刀射入被判越位在先，以及格連活特係45分鐘左路燙射射斜出界。
更衣室出返嚟之後，華拉尼50分鐘上前成功封阻對手落底傳波，57分鐘般奴右邊cup過對手再橫傳俾辛祖被對方球員先來一步解圍後，費特一記遠射射得太正被沒收。62分鐘狼隊傳中俾隊友起腳不過撻Q射出界，68分鐘狼隊獲得角球攻勢，開出後門前有人頭鎚攻門先被迪基亞救到，對手立即補射再被迪基亞神救，兩隊繼續未有取得任何入球。隨後狼隊70分鐘一記遠射被迪基亞接實之後，攻力開始減弱，而曼聯則係80分鐘成功把握機會領先狼隊，格連活特右路假動作推過對手後起腳射遠柱入網，協助曼聯領先至1比0，曼聯亦最終憑住格連活特嘅入球小勝狼隊。
