Sorry...本童子睇得台劇同韓劇少...下一幕通常係咪會......
---------------------------------------
【鬼故嚟0架？】變身「復仇女神」
碧兒不甘被飛 4萬月租搬去陳豪隔籬？
今早陳豪出席慈善跑時，被記者問到廖碧兒忽然做咗佢同太太茵媺口嘅鄰居，問佢點睇。陳豪就好大方咁……避而不談，只係話：「唔太方便講，我哋依家係一個好開心嘅家庭，以前嘅嘢已經過咗去，希望人人生活都好，我哋生活都好好。」
咁究竟發生乜嘢事呢？點解方面兒——即係廖碧兒明明長駐內地搵人仔，何以忽然又變咗陳豪鄰居？
事緣今日有周刊話，方面兒呢，好唔甘心，唔甘心啲乜呢？理由都真係幾耐人尋味。報道話，2010年，方面兒背住陳豪同林忠豪約會，諗住釣金龜，點知未釣到已經俾傳媒踢爆咗，陳豪更單方面宣佈分手，令事件冇彎轉。轉咩彎呢？唔通方面兒諗住陳豪可以當冇事發生過？
故事話，自從陳豪主動提分手兼且高調表明唔復合，仲話咁快搵到陳茵媺做人生另一半；反觀方面兒，一個字講晒，就係黑。莫講話搵富二代三代，就連內地發展亦麻麻，拍「荷李活片」變出DVD了。不過佢近年都開始轉行賣紅酒，讀埋證書，發展唔係差喎。呢，早排仲俾人影到相約陳法拉前夫薛世恒去咗摸酒杯底「深入了解」添。
撐遠咗。係喇，今日篇報道就話，方面兒眼紅陳豪同茵媺咁幸福，依家又有第二胎喇，出於妒意，竟然同銀紙鬥氣，今年九月以四萬月租大埔比華利山一個約2,700呎單位，同陳豪茵媺嘅4千呎單位係爭少少，但一個人住都夠啦。報道仲話，方面兒住嘅地方，就係住正陳豪隔籬，咦，容乜易撞口撞面0架？
報道仲話，方面兒周不時都會喺屋苑跑步，話係博偶遇喎；仲話方面兒一向投資有道，喺將軍澳同灣仔都有單位，而且通常都係自住，絕少租屋。今次一反常態租住比華利山仲咁啱住正陳豪隔籬，擺明死纏……報道係咁講。不過方面兒就同周刊記者表示間屋係佢親戚嘅，冇講係咪搬咗入嚟。
