隔牆有耳:鼠王芬粉絲係演員
狂言選民應該受到懲罰嘅鼠王芬,近日四面楚歌,星期三朝早,有十幾個支持者到立法會外獻花兼拉橫額「支持您到底」,不過呢班粉絲好得意,同梁美芬合照時遮遮掩掩唔敢上鏡,其中一個金髮青年例外,由於佢太搶鏡,相片見報即被人認出係電影《機動部隊──伙伴》嘅要角 Ricky,好多人頓時質疑鼠王芬請臨記撐自己。
議員明目張膽造假咁離譜?正義網民好快就將 Ricky起底,指佢在紅磡做髮型師,八方噚日去搵佢,不過 Ricky冇返工。由於 Ricky拍過戲,算係演員,因此唔少街坊都認得佢。八方後來搵到 Ricky嘅朋友,據講 Ricky有印度血統,仲有個中文名陳鎮華,難怪廣東話對白咁流利。
呢位人士又透露,獻花班人今個星期二「被通知」翌日去中環獻花, Ricky絕對冇收錢,只係有啲嘢想搵梁美芬幫手才答應現身。 Ricky本身有正職,唔係臨記,拍戲只此一次。有臨記公司負責人指 Ricky唔係行內人,「應該係杜琪峰嗰邊直接搵佢」。
Ricky唔露面,噚日有網民聲言代表 Ricky「傳話」,喺網上留言,指 Ricky做髮型師 13年,唔係臨記,拍戲只係朋友叫到,貪玩試吓。據網上「傳話」, Ricky經表姐認識梁美芬,想反映一啲南亞裔人士嘅權益問題,佢撐梁美芬並冇收錢,強調自己唔識政治。
鼠王芬收花後,噚日似乎冇乜起色,在立法會開會冇厘精神扁晒嘴,雖然好多記者想問佢 fans遮面獻花單嘢,睇吓佢如何澄清畀錢請人撐自己傳聞,不過佢刻意迴避;有人聲稱目擊鼠王芬眼濕濕坐在立法會前廳,個樣睇落十分愁,所為何事無人過問,有人估計鼠王芬可能係因為辦事處被淋油漆而唔開心。
八方覺得鼠王芬今次應該大步檻過,因為 facebook個「我相信有 10萬人不想梁美芬再當選議員」群組,截至噚晚都只係得 2.7萬人左右加入,使乜驚呀!
http://hk.apple.nextmedia.com/templa...av_id=15433898
裏面有動新聞睇
又比高登仔推上報