|
長洲麥記賣3日齋包
【明報專訊】去麥當勞食嘢通常都係大啖肉，會被人話唔太健康，不過麥當勞都搞吓新意思，為響應太平清醮，長洲分店喺噚日至17日（周五）期間推出脆香素菇包，單叫19.5元，跟餐就賣31.5元。對於有素食者擔心食品會用動物油烹製，麥當勞就話，香港麥當勞嘅食品均採用植物油烹調。
網民要求變「常餐」
有網民噚日上載脆香素菇包圖片，話大家去長洲食平安包，亦可以試吓素菇包。唔少網民都like，但亦有愛素食嘅網民話如果長期供應就好，仲話唔應該只喺長洲發售。有網民仲話，麥記喺印度已經提供素食，強烈要求麥記加入素漢堡至每日同全港有售。
Emily無機會試素包，但既然咁多網民想麥記提供素包，麥記都可以諗諗。麥記無答覆會唔會咁做，但就話好重視顧客意見，會積極研究推出唔同產品以迎合顧客喜好同需要喎。
|
