Games Animation Forum

查看單個文章
舊 06-13-18, 11:36 PM   #41
Kinny Riddle
Game Master
 
註冊日期: Jun 2006
文章: 2,916
呢集劇本一般,但氣氛同燈光演出就真係要比滿分。

恐龍,顧名思義,就係「恐怖的龍」嘅意思。

呢集真係感受到恐龍嘅「恐怖」,起碼坐我附近嘅死小孩嚇到不斷尖叫。

同平時喺熱帶森林跑嚟跑去唔同,今集角色比較多時間被困喺陰暗嘅室內空間被班食肉恐龍獵捕,感覺好似睇緊恐龍版「生化危機」

吐槽1

吐槽1:嗰件僱傭兵阿頭用麻醉槍射暈個「兇王速龍」後,唔係走去補多幾粒子彈,而係打開個籠門仲要行入去收集牙齒。你有冇再低能啲??

真係抵你比條龍食咗。你就唔識得先隊冧咗條龍先走入去收集牙齒咩??

感覺編劇只係為咗放條龍出嚟先諗出咁腦殘嘅編排。不過都仍然有好多更好嘅方法架,例如之前Owen放條頭骨龍入嚟搗亂時,可以比隻頭骨龍誤打誤撞唔小心打開個籠門架。點解係要咁低B?


吐槽2

你話當時以為個島嘅火山係死火山,冇諗過佢會突然復甦,我都收貨。但你同我講Owen佢可以跑得贏火山碎石流仲要完全冇燒傷?冇嘢吓?真係睇到即刻笑咗。

有睇開國家地理嘅紀錄片都或者知道,呢啲碎石流係極度高溫,成6000幾度都有,而且速度隨時跑贏一架跑車。比呢啲碎石流追上,只有死路一條,而且係死相恐怖,外皮完全燒焦不特此,大腦同內臟仲會即時蒸發,就好似被突然放入微波爐一樣。羅馬帝國附近有座被火山消滅嘅城市,啲居民啲屍體就係咁嘅恐怖狀態被發掘出嚟。

就退一萬步當俾你跑贏碎石流成功跳落海,啲碎石流嘅容量係以幾千立方米嚟計。就算俾你跳到落海,咪又係會俾啲碎石流淹沒。同埋唔好唔記得呢啲碎石流係極度高溫,一接觸到海水就會極速變成超熱嘅滾水。就算冇比碎石淹沒,都會被滾水煮死。


對唔住,我太認真了,不過真係不吐不快。

結局同下集伏線

Blue先係今集主角。由頭到尾都係咁搶鏡。不過最後同其他恐龍被放生,危害美國中產居民生命(無誤

最後由個複製蘿莉放生啲複製恐龍可以話係好諷刺。會唔會好似新版「人猿爭霸戰」系列一樣,人類因為玩弄科學而自招滅亡,變成「人龍爭霸戰」:人類與恐龍搶奪地球話事權?

拍賣時已經有幾隻恐龍被軍火商運走,相信呢啲恐龍會被呢啲軍火商基因量產成為武器,為下集嘅「侏羅紀大戰」鋪路。

最後就係製造呢啲「兇王速龍」嘅科學家胡博士再次逃走咗。喺原作小說佢只係一個路人甲,而且好快被速龍活生生撕開內臟。或者可以期待下集「三部曲」終結時呢位隱形反派會係同樣下場?最好由阿Blue落手食咗佢。

之前都知Jeff Goldblum只會以客串性質亮相,不過安排喺片頭同片尾做開頭同總結嘅旁述確實係最啱佢呢個角色嚟做。


__________________
劇透加tag呢D屬於基本常識同禮儀嘅嘢唔洗教架啦,
居然仲會有人起晒桿話人侵犯佢哋嘅「知情權」。
無任歡迎呢D強詞奪理嘅人進入我嘅黑名單。

此篇文章於 06-13-18 11:45 PM 被 Kinny Riddle 編輯。
Kinny Riddle 目前離線   回覆時引用此篇文章
 

返回主題: [西片] Jurassic World : Fallen Kingdom (2018)