Games Animation Forum

查看單個文章
舊 08-22-17, 02:01 PM   #495
柴崎幸
The One
車仔蕃薯
 
註冊日期: Jun 2002
文章: 31,170
干地恐怖防守奧義(一)

英超首戰主場失利,兩員大將(法比加斯 & 加利卡希爾)停賽之下,車路士仲要「作客」熱刺,賽前唔少人都戥干地擔心,甚至有外國賭博公司將干地列為今季第一位被炒魷英超領隊嘅熱門人選,不過干地喺承認擔心自己會步摩連奴後塵嘅同時,亦都祕密地鑽研出一套唔輸畀當年「摩佬」首次執教車路士果陣由馬基利尼、艾辛、米基爾組成嘅三防中鐵桶陣,結果成功克制熱刺如行雲流水般嘅進攻,獲得今季英超衛冕路上的首3分積分。



上個禮拜,筆者聽到唔少睇開英超嘅球迷(非車迷)都表示:「車仔借晒啲人出去(蘇馬、洛夫斯捷克),搞到後備名單啲人唔識都算嘞,連正選果個(意指保加)都唔知係乜水,搞咩呀!」,於是心血來潮打算寫一篇關於保加(Jeremie Boga)同苗桑達(Charly Musonda Jr.)嘅文章,等無論係車迷定唔係車迷都可以認識佢兩個多啲,不過見到干地呢一仗鬼斧神工嘅戰術部署,我改變主意了。

高手過招,作為兩位上季英超冠、亞軍球隊嘅領隊,同時亦係喺球壇享負盛名嘅戰術大師,當然唔能夠一成不變,求其排個陣出嚟應戰喇!熱刺方面嘅普捷天奴,選擇捨棄發揮得淋漓盡致嘅3421陣式,將迪亞放番上中場,拍住雲耶馬同丹比利,轉踢4321,目的好明顯,就係要同車路士鬥硬淨搶中場。
唔知干地係咪估到普捷天奴會有此一著,結果排出一個三中堅三防中嘅陣式,將大衛雷斯推上一格,企喺簡迪同首次為車路士上陣嘅巴卡約高後面,形成防守力爆燈嘅中路防守線。

一開波車路士就反客為主(其實車仔踢溫布萊嘅次數分分鐘仲多過熱刺)、瘋狂迫搶,不落下風,而三中堅三防中嘅效用亦都慢慢展示出嚟,熱刺由上季開始,最大嘅殺著除咗哈利簡尼嘅射術之外,就係基斯甸艾歷臣同艾利(Dele Alli)嘅配合,艾利掌握時機、接應艾歷臣嘅無定向傳送,後上殺入禁區作出攻門、甚至取得入球嘅畫面,上季屢見不鮮,呢一招上個星期亦都喺紐卡素身上攞到甜頭,不過呢個畫面,今場比賽係一次都見唔到,無錯,係一次都無!原因喺邊呢?

壓制熱刺最拿手嘅進攻套路,可以話係干地喺今場比賽防守部署上嘅重中之重,六人嘅中路防守分成兩排,將對方喺危險區域攞波嘅機會同時間壓縮到最低,令熱刺左搓右搓根本都無辦法將個波輕鬆傳番入中路,好多攻勢都係因為中間太過密集而被迫分向兩邊,哈利簡尼亦因為喺中間無波踢而經常現身兩邊邊線,首席射手離開禁區越遠,威脅力自然就會係越低,當然,上半場尾段佢亦都係有啲唔好彩嘅,難得艾利可以有一次成功突破,過到艾斯比列古達然後分到個波畀佢,但可惜勁射中柱,依然未能夠打破自己歷年來喺英超8月份未入過波嘅尷尬局面。

至於艾利,今場比賽除咗後上突入嘅畫面欠奉,就連靈巧嘅one touch傳送或者盤扭場面亦唔多見,無他嘅,干地喺領先1比0之後將簡迪同巴卡約高嘅位置互換,簡迪由一開波三防中靠近左邊果個,換咗去踢右邊,專責對付護波能力出眾而且有冷靜頭腦嘅丹比利,減少丹比利嘅掂波機會,而當摩西斯同艾斯比列古達搞唔掂艾利嘅時候,簡迪亦都會幫手返嚟補位,令到艾利好多時候都要面對3名防守球員,就算畀佢突破成功,都總會有人可以立即對佢作出犯規,防止佢殺入禁區。

http://football.fanpiece.com/Blueisc...-c1293401.html


__________________
7/4/2006:東京之旅:池袋、浅草、川越、原宿、新宿、皇居、銀座、秋葉原、月島、築地、三鷹、台場、上野。
22/7/2006:北京之旅:王府井、雍和宮、天安門廣場、故宮、景山公園、什煞海胡同、頤和園、圓明園、八達嶺長城、明十三陵、老舍茶館、天壇。
11/8/2007:北海道之旅:札幌、薄野、定山溪、小樽、登別、富良野。
28/12/2008:華東之旅:杭州、烏鎮、蘇州、無錫、上海。
9/8/2009:首爾之旅:雪嶽山、驪州、南山、新村梨花女子大學、明洞、南大門。
1/8/2010:北海道之旅:札幌、大通、すすきの、富良野、中富良野、上富良野、美馬牛、美瑛、函館、五稜郭。
31/7/2011:歐洲之旅:英國倫敦、意大利羅馬、梵蒂岡、佛羅倫斯、威尼斯、米蘭、瑞士琉森、德國海德堡、法蘭克福、科隆、荷蘭阿姆斯特丹、華倫丹、比利時布魯塞爾、布魯日、法國巴黎。
柴崎幸 目前離線   回覆時引用此篇文章
 

返回主題: 車路士球迷會Vol.35 ﹝~ 英超:巴克里一傳一射,夏薩特及莫拉達各入一球,車路士3:0輕取修咸頓!~﹞