蘇斯克查超越費格遜 預演歐聯絕地反擊
傷兵滿營嘅曼聯周四(28號)喺英超作客3比1擊敗水晶宮，只係落後第3嘅熱刺5分同第4嘅阿仙奴1分，後上氣勢相當凌厲。「紅魔鬼」今場贏波更創造一個超強紀錄，自從蘇斯克查上任之後，曼聯已經連續8場作客賽事贏波，創下球會史上最長作客連勝紀錄，就連佢恩師費格遜都只係2次做出作客7連勝(1993年、2002年)，難怪球迷要求蘇斯克查「轉正」呼聲愈嚟愈熱！
喺蘇斯克查呢作客8連勝入面，對手包括熱刺、阿仙奴同車路士等勁旅，而且有6場係贏2球或以上，絕對唔係「負碌」。曼聯嚟緊2場作客賽事，將會係最關鍵兼最難打嘅硬仗，先係下周中歐聯作客巴黎聖日耳門，要收復首回合輸0比2嘅失地，4日後再喺英超作客阿仙奴，呢場亦屬前4爭奪嘅決定性戰役，「紅魔鬼」如果可以延續呢股作客氣勢，今季好可能會有美滿結局。
