A股後市點收科就未知,但肯定中國政府嘅聲譽已毀。連日救市措施,已見到中央係點樣夾硬嚟,再唔係就「捉鬼」屈外資沽空要嚴懲。今日睇高登,有網友將外媒報道中國股災嘅報道結集。其中最精彩嘅,莫過於德國報章《Handelszeitung》起嘅標題:這次金融風暴將會是「Made in China」,內文講明今次係中國自製危機,過度槓桿引致。
中國為實現中國夢,自己吹起股市,為自己製造出一個巨型炸彈,增加硬著陸危機,仲老屈外資「惡意沽空」。情況就似一個賭仔輸身家,發茅屈賭場呃佢錢,而此亦反映,佢已冇晒計,輸錢就是任性。噚日最新有傳,中證監要求向上市公司大股東同高層,如曾於近半年內減持,強制要作出一定比例增持。俗語話,「有強姦,無焗賭」,依家中央為維穩,夾硬迫公司上賭枱,唔畀沽,咁同打劫有咩分別?相信唔少外國元首,睇住中國狼狽救市,掩住半邊咀笑。
最慘係,大媽借孖展借到爆煲,香港股民硬食陪葬,港股今日曾創有史以來最大跌幅。內地人成日都話,「要不是中央政府照顧你們香港,完蛋了。」麻煩以後唔好再畀我聽到呢句,阿爺為咗暴力救A股,於是暴力沽H股,實情係「要不是香港畀你沽,你們A股一早完蛋了。」
可幸嘅係,以往大家驚大媽玩港股,會劣幣驅逐良幣。經此一役,大媽走左唔少,料港股逐漸由有正常投資思維,會睇基本因素嘅既外資同港資主導市場,料港股距回歸理性時候不遠。
我發覺呢排D"好事" 都係對方自爆 跟本D乜野反對派外國勢力唔做野
共產黨都賴緊野
肥仔單野又好 政改單野又好, A股賴野轉頭先睇到香港金融中心地位 全部都係共產黨自爆
而家最驚係共產黨遲早搞埋香港 你知佢地做野唔用腦架啦..