搵曼聯球員搭路 古天奴心急成魔
雖然巴塞隆拿上場聯賽以3:1擊敗華歷簡奴,但中場菲臘比古天奴表現唔掂,仲畀巴塞球迷噓爆。
英國《每日郵報》爆料,指呢位28歲巴西國腳覺到非常無癮,進一步加強離隊決心,更有傳佢私下向曼聯球員搭路,希望成「魔」,估計曼聯只需出1億鎊(約10億港元)轉會費,就可以簽入菲臘比古天奴。
菲臘比古天奴上年1月以1.42億鎊,由利物浦轉投巴塞,但表現一直未如理想,今季更加愈踢愈沉,佢近15場聯賽都冇波入,只有1次助攻,猶如「隱形人」,巴塞球迷都睇唔過眼,即使球隊贏波,都要噓佢。
事實上,之前已經有傳菲臘比古天奴想返回英超,但佢同利物浦不歡而散,好難回巢。最大機會收留佢嘅英超球會,應該係曼聯。更有傳「古仔」都問過曼聯球員,有關紅魔鬼嘅情況,似乎好有興趣成「魔」。
曼聯由蘇斯克查執教之後,魔性澎湃,梗係吸引到各大球星,但要成1億鎊先至買到菲臘比古天奴,恐怕紅魔鬼高層未必要佢喎。
|