《Deadline Fighter》Good Deal or Panic Buy？誰人會在限期前穿起藍色球衣？
距離轉會大限之期不足三日既時間，過往好幾個轉會窗，車路士都會喺限期前進行收購，當中有好既交易亦有一啲係Panic Buy(恐慌性收購)既交易。著眼於今個轉會窗，究竟仲有邊個會喺限期前能夠穿起藍色球衣？一齊睇分析一下。
喺藍軍開季至今一共三場聯賽賽事，不論勝負，其實都見到車路士無論喺場上場下都存在唔少上季留落黎既問題未解決，尤其係喺板凳深度上，而高層一連串「有計劃」既排山倒海式輸出球員，明顯配合近年量入為出政策以及為來年興建新球場籌集資金而鋪路。當然，用喺收購莫拉達、巴卡約高同魯迪加哩三個重點收購上所洗既錢亦都唔少，但係人腳上今日既車路士根本就連應付四條戰線既基本要求都不能達到。
干地向外界既言論明顯係對球會施壓，而意大利人亦「盡做」自己職責範圍可以做到既野，始終球員買賣權不在主帥手中，而且干地職級上只係主教練，名義上更比前車路士掌舵人摩連奴為低，高層亦只會參考干地所提供既心儀名單而「選擇性」作下一步行動。
據悉高層向干地承諾會喺今個轉會窗完結出再提供多三名新球員，而未喺有收購前球隊已經將邊路攻擊球員保加外借到英冠伯明翰，人手上絕對係捉襟見肘，同時亦表示球會務必要出現新收購至可以「交到數」；先講後場，其實中堅絕非球隊最急切既引援目標，即使在三中堅陣式下隊中經已有五位球員能勝任其任，所以相信修咸頓既雲迪克只會係車路士既後補方案，況且球員所需既轉會費亦令大部份球迷唔憧憬哩單轉會發生。
到翼衛方面，哩個位置既引援工作先係球隊首要任務，由上季季尾一直傳聞求購祖雲達斯既阿歷士辛度，就知道連高層都明白迫近眉睫，但即使收購價一次比一次高亦無阻老婦人留任辛度在都靈既決心，唯有著眼物色其他可行人選。位置上傳出既仲有巴黎聖日門既奧里亞、修咸頓既施迪蘇亞雷斯同阿仙奴既張伯倫，前者由於入境所限導致球員轉會事宜一拖再拖，而較接近加盟既係另一支倫敦球會熱刺；而施迪蘇亞雷斯亦屬只聞樓梯響，相信球會連基本報價亦沒有；至於張伯倫就係比較「近磅」既一位。
英國《Skysport》經已報導車路士與阿仙奴雙方已就轉會費上達成一致協議，先唔評論球員同阿仙奴近期既表現，單係睇功能同針對位置人腳上張伯倫就係藍軍依加最急切所需既一員，哩位英格蘭大國腳能夠勝任左右翼衛、中場以及邊路攻擊手，正正就係車路士需要提升板凳深度同競爭力既地方，如果哩單轉會最終能夠成功官宣絕對係一單「Good Deal 」；到中場方面，巴卡約高既加盟其實並非做就馬迪離開既主因，干地亦好詫異球員選擇加盟到宿敵曼聯，同時青年軍所上黎既查路巴因時間不等人而離開，位置上收購中場既排序絕不比翼衛低。
雖然張伯倫能勝任其位，但在四線作戰之下人數上仍需提高，比較接近既係同屬英藉效力愛華頓既巴克利，以及效力李斯特城既真禾特，而球迷對兩者既意見都好壞參半。先講前者，巴克利離開愛華頓只係時間問題，拖肥今夏大肆擴軍已經沒有預留佢既位置，近年哩位曾經係英格蘭既明日之星發展停滯不前，如果轉到干地手下未知會否得以改善。至於真禾特曾與簡迪一同在李斯特城共事，合作絕對不成問題，始終車路士中場缺乏與兩者相同特質球員，只可惜佢兩位都有傷在身，同時收購巴克利就需要與熱刺競爭一番。
到邊路進攻以及前線球員，相信只有國際米蘭既簡達華，以及史雲斯既洛蘭迪會係目標，前者可以話係邊路上既通天老倌，雙槍將左右腳都可以出波，而同屬干地同一經理人，一直都係哩位意大利主帥心儀目標，但國米已經將祖維迪放到摩納哥，早前表示今季只會放多一名球員既任務已經完成；而洛蘭迪既傳聞相信只係在干地手中第三前鋒既安排，多一種不同類型既前鋒好讓在戰術上或調動安排上更加靈活，但不幸地跟巴克利同真禾特一樣哩佔西班牙中鋒亦在養傷當中。
雖然未知到真正「死線」前會出現以上那一單轉會，只能在最後跟球迷說一句，平常心吧。
http://football.fanpiece.com/bluexli...-c1294212.html
