【ATV官方回應：正常運作…】明晚七時結業？唔係亞視永恆咩？
引用:
亞視一向都多負面新聞就眾所周知架啦，今日又有新改圖傳出倒閉嘅消息。不過亞視發言人黃守東就否認話﹕「呢啲係謠言，公司運作正常據悉呢張圖上年已有，被人惡搞」，仲話公司一切運作正常。有人就話，香港人眼中嘅「正常生活」就係「港豬式嘅生活」，而亞視眼中嘅「正常運作」，就係唔出糧，停播晨早新聞同十二點半新聞……
但係張改圖幾可亂真，用咗當時宣佈停播十二點半新聞嘅電視畫面做底，內容寫住﹕「由於本公司資金及人手不足關係，亞洲電視將於明天晚上七時正正式結業，屆時旗下所有頻道終止廣播，敬請留意」網民咁有心機改圖，留低嘅都係一份心意。
亞視發言人仲話對於有關惡意中傷，亞視保留追究權利。其實你有錢打官司追究人，不如出糧俾啲伙計先啦。就嚟新年喇，俾佢哋安樂過新年得唔得呀？
網上有傳聞話亞視將會聽晚七點結業，今日返去亞視派散水餅嘅張家瑩就好愣然話無收到呢個消息，但就好心痛，仲即刻喊出嚟﹕「好唔捨得，無諗過咁樣走，因為呢度經歷好多開心嘢，好多都好難忘，同事叫我加油，今次走迫不得已，無論公司係咪今、聽日或者後日結業，希望佢好好咁守落去，將來搵我拍嘢我都會拍。」
不過亞視員工都唔需要絕望，東家唔打打西家架啫，因為港台數碼31台將會接管亞視模擬頻道，廣播處長梁家榮話視乎港台空缺情況決定會否吸納亞視員工，並期望31台能由早上到深夜均有節目播放。
呢張圖被廣傳之後，有網民抽水話﹕「如果張圖係真嘅話，聽日六點五十九分會係亞視最高收視嘅一刻。」不過大家抽水還抽水，都要諗下亞視員工嘅感受。
|
河：亞視永恆當...~~~
