|
【睇通英超】You are my Solskjaer, my Ole Solskjaer……
【now.com體育】好難數得清蘇斯克查球員時代喺聖誕快車入過幾多波，家陣睇佢教波，仲要係接燙手山芋，唔知佢能否令曼聯球迷過開心聖誕？今日，唔知曼迷又會唔會唱番當年作畀佢嗰首飲歌？ 撰文：球十三
“You are my Solskjaer, my Ole Solskjaer, you make me happy, when skies are grey……（之後係侮辱對手嘅粗口，省略）”就算你唔係蘇斯克查（Ole Gunnar Solskjaer）粉絲，只要有番咁上下球齡，應該都聽過呢首曼迷為佢寫過嘅歌，而無論係蘇斯克查、蘇B、蘇斯黑柴、娃娃臉殺手乜都好，又係細細個就聽過佢個名。 至於話曼聯係燙手山芋，淨係睇莫耶斯、雲高爾、摩連奴幾個來投前嘅強勢領隊，一個又一個敗興，就知呢隻紅魔幾難收伏，即管睇佢當年喺費Sir身上學到嘅招數（唔知包唔包「吹風筒」），可唔可以應用喺今時今日隊紅魔。 又真係咁橋，蘇B回歸首場係「雙重回歸」，係回歸卡迪夫城。老實，當佢識變「魔」術，一時三刻都變唔出咩樣，係要啲時間，但當我小人之心，如果之前真係有球員（唔具名啦）因為唔妥摩佬冇去盡嘅，斷估易帥後都會即時做嘢，今晚隻紅魔，可能煥然一新。
講吓其他球隊，利物浦又贏，曼城應該受壓，不過藍月今日對手只係水晶宮，仲要係主場出擊，齋睇水晶宮近期作客好旺「3」──係起勢似倒水咁失3球，隱見大炒格，贏幾多視乎哥迪奧拿留幾多力。頭場阿仙奴主場對般尼格局似，般尼只怪唔好彩，遇著急求反彈去盡嘅兵工廠，係凶多吉少。 最後都係想講句，聖誕聽唔到摩佬鬧人鬧球證鬧賽序安排，有啲唔慣。
|
