|
［自身經歷，文長注意］
今日食手撕雞包發生左件事，我覺得應該要寫番出黎話俾大家知
自己食過手撕雞包覺得唔錯值得encore
於是頭先收工就諗住再整個黎嘆
點知咬落頓覺奶野，舊炸洋蔥既炸漿竟然韌到爆，好似咬緊紙皮咁
心諗可能舊包整好擺得耐左擺到韌左(?
點知講完換過舊新包只係好少少，韌既程度只係由到瓦通紙變成卡紙
我明白俾左幾多錢就有幾多質素呢個道理
我亦明白換左新包都無改善就應該唔係個別洋蔥既問題
於是我只係再走埋counter同佢講清楚我上次同今次食到出黎既分別
無再叫佢換過舊包俾我
番埋位諗住抆走舊紙皮食埋個包就算數
食到差唔多尾聲，頭先係counter聽我講意見果位唔係著Tee既同事走埋黎
用一秒幾十字既速度同我講左佢地檢視過食物質素，製作過程等等
都無發現有問題
亦都稟告左佢經理話有咁既事
話佢地會keep住留意番之後會唔會有咁既問題
老實講我唔係好記得晒佢講既野，因為真係講得太快，聽得切黎都記唔切XD
最後佢同我講因為佢地既食物達唔到我既預期，所以會退番成個餐既錢俾我
事發得好突然
但我淨係知我食左個包飲左杯汽水
雖然係失望
但食左就係食左
食左就應該要俾錢
我如果真係R你錢就頭先同你無限換包啦
我推卻講我唔駛退款，但佢就堅持我收
於是我收左
係我離開餐廳既時候擺低左$40.8入麥當勞叔叔之家個錢箱入面
好似文太長無乜重點
但我覺得佢真係有聽過我意見，有心去跟進過（又或者其實只係擔心之後俾人係熱線/email投訴)
雖則跟完好似無乜點解決到
點都好，我覺得呢位麥記同事今次係值得讚一讚既
|
