|
全場小分析
2023/24 英格蘭超級足球聯賽第二十三場
曼聯 vs 韋斯咸
全場完，曼聯 3:0 韋斯咸
週末繼續係英超賽程，主場迎戰鎚仔幫，上次作客輸俾鎚仔幫嘅曼聯，沿用上仗大部份正選球員，只輪換麥佳亞配搭馬天尼斯鎮守防線，希望承繼上仗贏狼隊嘅士氣返到主場一舉擊敗韋斯咸。
上半場早段雙方形勢較為混亂，不過曼聯速率及組織都不及上仗對狼隊嘅表現，韋斯咸則選擇中前場壓逼，令曼聯中後防線無太多機會交出傳送。10分鐘韋斯咸差啲先開紀錄，對手開出角球後，小禁區邊有人跳起頭鎚頂中人反彈，奧拿拿有反應救出。其後曼聯開始進攻，先係14分鐘般奴無人看管下遠射被門將飛身撲出，22分鐘曼聯憑住賀隆領先至1比0，卡斯米路上前攔下球權，賀隆一控一推再右腳勁射入網，信心十足。上半場中後段時間雙方都尋求機會撕破對手防線，但兩邊攻勢並唔入肉，尤其韋斯咸幾次兩邊落底線傳中，中路有人接應，不過埋門一腳就水準以下...曼聯帶住一球優勢返入更衣室。
下半場曼聯球員好快入局，45分鐘賀隆及般奴左路邊線一次撞傳配合下，賀隆插入小禁區邊接應加拿祖短傳窄角度起腳，可惜射中網側出界，48分鐘曼聯領先至2比0，加拿祖接應般奴橫傳後，心口一控一cup再射，省中對方球員反彈入網，下半場初段短短唔夠10分鐘，曼聯已經有5次埋門機會。隨後韋斯咸靠打反擊製造威脅，68分鐘邊線一次長傳交俾前場球員，麥佳亞頭鎚解圍唔成功，幸好有達洛治回防落鏟成功攔下射門。尾段83分鐘後備入替嘅麥湯文尼中場位置搶下球權，帶波推至禁區頂斜傳俾加拿祖射遠柱地波入網，協助曼聯拉開比數至3比0，最終曼聯主場擊敗韋斯咸全取三分完場。值得一提係下半場馬天尼斯因傷退下火線，唔明白點解唔一早換走...
|
