淺談－保加, 苗桑達
記得上次講過話想介紹兩位車路士年輕小將保加(Jeremie Boga)同苗桑達(Charly Musonda Jr.)畀大家認識認識，但結果就畀干地嘅三中堅三防中新戰術吸引咗去，不過有心唔怕遲，雖然唔知之後當夏薩特復出，柏度同韋利安都健健康康嘅時候，佢兩個會唔會從此人間蒸發，但佢哋話晒都係車路士嘅球員，點都同大家簡單介紹吓佢哋喇！
保加同苗桑達，佢兩個其實都有唔少相同之處，同樣係20歲仔，都係身高唔過1米75嘅矮腳虎，踢法上都係屬於速度盤扭型，而且上季都先後以外借身份效力過西甲球隊，當中保加上季效力最終護級失敗嘅格拉納達，話就話好多時候都係以進攻中場身份出現喺正選名單之中，但好多時踢下踢下都會自己走咗去右路扮「迪路菲奧爆佢」，老實講，佢啲長、短傳，仲有傳中嘅能力就真係認真麻麻，但勝在叫做肯衝肯撞，偶爾會畀佢撞散對方啲後衛，執到啲起腳機會嘅，不過佢踢咗成季，都只係得2個西甲入波，少就少啲，但總算叫做入過巴塞波，算威水架喇！
至於苗桑達，其實佢喺15/16球季嘅下半季已經去咗貝迪斯，當時貝迪斯仲係踢緊4231，佢同回巢嘅祖亞昆一左一右，兩邊輪流出波，配合得相當唔錯，可以話係站穩咗正選一席，最終獲得貝迪斯續借多一季。可惜貝迪斯之後換上普耶(Gus Poyet)執教，係呀，踢過車路士同熱刺，又教過新特蘭果個呀！普耶「揸弗」之後，棄用所有年青球員，打老鬼波，令苗桑達失去正選，甚至連今季轉投皇馬嘅中場新星、新科U21歐國盃最佳球員施巴約斯(Dani Ceballos)都被放入雪櫃。唔受重用，加上膝傷嘅問題，令苗桑達喺舊年12月就提早番返去車路士，不過大家亦都唔需要為苗桑達覺得可惜，就算佢捱得過普耶當道嘅黑暗時期，之後接手貝迪斯嘅教練亦都主張532嘅踢法，擅長兩翼進攻嘅苗桑達，根本亦都無生存空間。
老實講，保加同苗桑達嘅踢法，點都係適合法甲同西甲多啲，當保加上季連格拉納達都踢唔掂，苗桑達喺返番車路士之後又完全唔入干地嘅法眼，睇怕呢兩名小將喺車路士嘅前景，似乎都唔多樂觀，但今季無論係季前熱身賽，定還是開「咧」之後，佢兩個好多時都能夠進入比賽名單，到底我哋應該理解為「干地有心為車路士培育年青球員」定係「車路士鋒線板凳深度不足、無良才可用」呢？
http://football.fanpiece.com/Blueisc...-c1294201.html
