大鼻老竇嫌棄便宜仔
黃光亮寸王祖藍未發育
當年王祖藍和黃光亮因樣貌相似，惹來兩人是父子的傳聞，及後澄清絕非事實。近日兩人合作拍無綫劇，昨日在電視城開鏡，祖藍和黃光亮名正言順演父子，但黃光亮擺明嫌棄祖藍，指他不似自己，更取笑他矮到似未發育。
無綫新劇《老表，你好嘢》（暫名）昨日在電視城開鏡，久違的黃光亮有份演出，其他藝員還有新加盟的萬綺雯、郭晉安、王祖藍、王菀之及張繼聰等，配搭新鮮。曾傳是父子的黃光亮及祖藍，在劇中飾演父子，朱咪咪則演祖藍媽咪，黃光亮表示在20年前他亦跟朱咪咪合作演處境劇《我愛玫瑰園》。
嘲身形矮似朱咪咪
問到黃光亮會否覺得他跟祖藍相似？他擺明嫌棄說：「唔似喇，點睇都唔似，真係唔明點解。」祖藍擦鞋說：「佢太靚仔，點會話似。如果真係話似，我覺得大家個發達鼻最似。」問到會否考慮上契？黃光亮說：「唔好搞啲咁嘅嘢。」無綫是否重酬邀請拍劇？黃光亮笑言：「唔使錢，友情演出， TVB問我有冇錢食飯，話會畀三餐我食。」接着他又出言踩祖藍：「你其實發咗育未？如果你高啲就似我，你嘅高度似朱咪咪。」
萬綺雯向胡楓賠罪
首次拍無綫劇的萬綺雯介紹其他演員時，未有提到飾演其父的胡楓，胡楓笑稱：「我嬲，你冇提我，你要請我飲咖啡，唔係就冇好日子過。」萬綺雯即「耍冧」說：「我新嚟，連路都未識。」劇中跟萬綺雯演一對的安仔則笑言可以帶路，但被她推卻好意，避免傳出緋聞。
同樣加盟無綫的陳煒，似未及萬綺雯好運擔正做女主角，萬綺雯說：「大家唔好比較， TVB咁多劇種，陳煒都係好努力嘅演員，佢都有實力。」另外，許亦妮扮演小三介入張繼聰和王菀之之間，會否擔心被師奶觀眾鬧？許亦妮表示：「其實呢啲喺生活成日發生，合則來不合則去，唔擔心。」
